Akureyrarbær á 98,2% hlut í Norðurorku. Aðrir eigendur eru Eyjafjarðarsveit, Svalbarðsstrandarhreppur, Grýtubakkahreppur, Þingeyjarsveit og Hörgársveit.
Á aðalfundi Norðurorku voru tillögur um breytingar á stjórn samþykktar. Þær þýða að minni sveitarfélögin missa áheyrnarfulltrúann. Breytingin eykur tortryggni í garð stjórnarinnar, segir oddviti sveitarstjórnar Eyjafjarðarsveitar.
„Þetta í raun eykur bara tortryggni og trú á stjórninni. Það er bara gagngert verið að halda litlu sveitarfélögunum frá. Réttara væri að hvert sveitarfélag sem á hlut í Norðurorku fengi áheyrnarfulltrúa,“ segir Hermann Ingi Gunnarsson, oddviti sveitarstjórnar Eyjafjarðarsveitar. Hann bendir á að þannig sé það hjá Orkuveitu Reykjavíkur. Þar eigi bæði Akraneskaupstaður og Borgarbyggð fulltrúa í stjórn.
Ný eigendastefna Akureyrarbæjar
Akureyrarbær hefur auglýst eftir tveimur óháðum stjórnarmönnum í stjórn Norðurorku, sem verða að vera búsettir á Akureyri. Með þessu á að fækka pólitískum fulltrúum í stjórninni. Áður voru pólitískir stjórnarmenn fimm en verða núna þrír, þar af tveir frá meirihluta og einn frá minnihluta. Hinir tveir verða óháðir Akureyringar.
Hlynur Jóhannsson, formaður stjórnar Norðurorku, sagði í samtali við fréttastofu að markmiðið væri að minnka áhrif pólitíkur í stjórninni og að gera starf stjórnarinnar faglegra.
Að sögn Hlyns er markmiðið að reka þetta frekar sem fyrirtæki en ekki pólitískt fyrirbæri. Með nýju breytingunum er ómögulegt fyrir meirihluta bæjarstjórnar að taka ákvarðanir í stjórn Norðurorku án samþykkis annaðhvort fulltrúa minnihlutans eða þeirra sem koma óháðir inn í stjórnina. Hann vonast til að þetta geri starf stjórnar Norðurorku faglegra.
Breytingarnar eru til komnar vegna nýrrar eigendastefnu Akureyrarbæjar, sem færist yfir á stjórn Norðurorku. Þar til nú voru sveitarfélögin fimm, sem eiga tæp tvö prósent í fyrirtækinu, með einn áheyrnarfulltrúa sem gat bókað eða komið með athugasemdir á fundum stjórnarinnar.
Fámennari sveitarfélögin ósátt
Bæði Grýtubakkahreppur og Hörgársveit hafa á undanförnum vikum gert athugasemdir við stjórn Norðurorku. Hörgársveit bókaði á fundi sveitarstjórnar í síðustu viku eftirfarandi:
„Sveitarstjórn Hörgársveitar lýsir undrun sinni á því að fyrirhuguð sé lántaka hjá Norðurorku með ábyrgð Hörgársveitar og annarra eigenda án þess að fulltrúar sveitarfélaganna annarra en Akureyrar komi nokkuð að ákvörðun um lántöku.“
Þá sendi Grýtubakkahreppur inn erindi til stjórnarinnar sem varðaði duldar arðgreiðslur að þeirra mati. Stjórn Norðurorku hefur greitt sveitarfélögum sem ábyrgjast lán þóknun sem að mati þeirra er ekkert annað en dulin arðgreiðsla.
Í nýjustu fundargerð stjórnar Norðurorku var forstjóra fyrirtækisins falið að svara þessu erindi, sem Hlynur segir byggt á misskilningi í samtali við fréttastofu.
Hlynur blæs einnig á gagnrýnina og segir að Norðurorka eigi og muni ekki greiða arð á meðan fyrirtækið stendur í lántöku. Nýverið sótti Norðurorka um 300 milljóna króna lán til Lánasjóðs sveitarfélaga.
Að sögn Hlyns verður eigendafundum Norðurorku gefið meira vægi en áður. Stefnt verður að því að halda eigendafundi tvisvar sinnum á ári en þeir hafa hingað til verið einu sinni á ári. Þar eigi allir sinn fulltrúa. Bæjarstjóri Akureyringa fer með atkvæði Akureyrarbæjar á fundunum og vegur það 98,2% á móti hinum atkvæðunum.
Hermann Ingi hjá Eyjafjarðarsveit segir eigendafundina góða sem slíka en að hann sakni þess þó að eiga sæti við borðið í stjórn Norðurorku.
Við erum ekki inni í rekstri Norðurorku og inni í þessum daglegu störfum stjórnar Norðurorku.
Ekki ósætti í fyrsta sinn
Akureyrarbær og Norðurorka fengu lögfræðing til þess að fara yfir skipun stjórnar Norðurorku og hvernig hlutirnir gætu gengið sem best. Hlynur segist ánægður með niðurstöðuna og vonast til að þetta minnki pólitísk áhrif í stjórninni og að starfið verði að öllu leyti faglegra.
Hlynur hefur gegnt stjórnarformennsku í Norðurorku í fjögur ár en lætur fljótlega af störfum. Við formennsku tekur Preben Jón Pétursson.
Aðeins eru þrjú ár síðan Eyjafjarðarsveit og stjórn Norðurorku fóru í hár saman. Þá neitaði sveitarstjórn Eyjafjarðarsveitar að gangast í ábyrgð fyrir lán sem Norðurorka ætlaði að taka. Þá bauðst Norðurorka til þess að kaupa sveitarfélagið út. Eyjafjarðarsveit á 0,12% hlut í Norðurorku. Það vildi Eyjafjarðarsveit ekki og skrifaði á endanum undir ábyrgð fyrir láninu.
