Samtök ferðaþjónustunnar segja stjórnvöld kasta krónunni fyrir aurinn með aukinni gjaldtöku á ferðaþjónustu sem boðaðar hafa verið í nýju fjárlagafrumvarpi. Fjármálaráðherra kynnti frumvarpið í dag og þingið kemur saman á morgun.
Gert er ráð fyrir að fimm milljarðar fáist með gjaldtöku á ferðaþjónustu og fjórir milljarðar með hækkun virðisaukaskatts á baðlón.
„Þetta eru auðvitað bara mikil vonbrigði fyrir ferðaþjónustuna,“ segir Pétur Óskarsson, formaður Samtaka ferðaþjónustunnar. „Eins og þetta er lagt upp er þetta mikið högg fyrir okkur og verra en við bjuggumst við.“
Tillögur um bætta nýtingu á jaðarsvæðum
Pétur segir aukna gjaldtöku draga úr ferðamannastraumi hingað til lands og þar með tekjum ferðaþjónustufyrirtækja sem Pétur segir skila mun meiru í ríkissjóð en boðaðar aðgerðir stjórnvalda.
„Í stað þess að koma með í það ferðalag sem við erum að bjóða þeim upp á, þar sem við getum bætt nýtingu innviða yfir vetrartímann og á jaðarsvæðum og aukið þannig tekjur ríkisins mun meira en hér á að reyna að ná, að stjórnvöld skuli velja að fara í þessa samdráttarleið sem er sú leið að leggja auknar álögur á greinina til þess að draga út mætti hennar, það eru mikil vonbrigði,“ segir Pétur.
„Við erum auðvitað bara mjög sátt við of stolt af því að vera öflugur skattgreiðandi í þessu landi. Skattsporið okkar eru einhverjir 200 milljarðar á ári.“
„Högg og vonbrigði“
Ferðaþjónustan skili jafnframt um 20 milljörðum í arðsemi eftir skatta.
„Þarna er verið að teygja sig í einhverja níu milljarða af þeim – sem sagt helminginn af því sem er afgangs þegar við erum búin að greiða alla venjulega skatta og skuldir. Þannig að þetta eru högg og vonbrigði.“
Pétur segir að síðustu ár hafi mörg skref verið tekin til að auka tekjur samfélagsins af ferðaþjónustunni, til að mynda með gistináttagjaldi og innviðagjaldi. Nú sé í þriðja sinn verið að leggja gjöld til að fjármagna sama verkefni – að viðhalda innviðum og verja náttúruna á fjölförnum ferðamannastöðum.
„Það er sorglegt því í fyrstu tveimur gjöldum þá hafa þessir fjármunir ekki allir skilað sér í þennan tilgang sem var lagður til í upphafi,“ segir Pétur.
„Við erum að fjármagna, og erum með nægt fjármagn til að sinna innviðum og náttúruvernd í dag. Þannig að það er ekki skortur á því heldur virðist þetta vera í dag eins og oft áður – bara almenn tekjuöflun ríkisins í alls konar aðra hluti.“
Virðisaukaskattur á baðlón „landsbyggðaskattur“
Pétur óttast að hækkun virðisaukaskatts á baðlón bitni á ferðaþjónustu á landsbyggðinni, ekki síst fjarri höfuðborginni.
„Það hefur náttúrulega fyrst og fremst áhrif á landsbyggðina, þetta er landsbyggðaskattur í raun. Við erum með 12-13 baðlón núna í rekstri á Íslandi og þau eru nánast öll úti á landi,“ segir Pétur.
„Það eru baðlón sem eru lengst í burtu frá Reykjavík sem munu finna mikið fyrir þessu og þar er verið að tala um bæði að stöðva fjárfestingar og eins líka að loka yfir vetrartímann, sem er mjög alvarlegt mál.“
Baðlónin endurspegli sérstöðu íslenskrar ferðaþjónustu og hafi mikið aðdráttarafl.
„Það má segja að baðlónin séu krúnudjásn íslenskrar ferðaþjónustu, okkar sérstaða, og að ætla að skrúfa þá sérstöðu eitthvað niður er ekki mjög skynsamlegt.“
