Evrópusambandið ætlar að setja 200 milljónir evra aukalega – jafnvirði 28 milljarða íslenskra króna – í fjárfestingar á Grænlandi næstu tvö árin. Þetta tilkynnti Ursula von der Leyen forseti framkvæmdastjórnar Evrópusambandsins á blaðamannafundi í Nuuk í morgun.
Þetta jafngildir alls 400 milljóna evra fjárfestingu á þessum tveimur árum – jafnvirði 56 milljarða íslenskra króna.
Stuðningurinn snýst einkum um þrennt: hreina orku, mikilvæga málma og netsamband. Í morgun var undirritaður samningur milli Evrópusambandsins, Grænlands og Danmerkur um það síðastnefnda, sem felur í sér níu milljóna evra fjárfestingu í öflugra gervihnattasambandi.
Evrópusambandið leggur til fimm milljónir og Danmörk og Grænland tvær hvort. Þetta á að styrkja netsamband í dreifðari byggðum í Norður- og Austur-Grænlandi.
Von der Leyen bætti því við að það eigi líka að tryggja ungum Grænlendingum möguleika á námi erlendis í gegnum Erasmus-verkefnið. Í gegnum það hefur fjöldi manns farið í skiptinám innan landa Evrópusambandsins og Evrópska efnahagssvæðisins.
Á blaðamannafundinum lagði von der Leyen jafnframt áherslu á að framtíð Grænlands ætti að vera í höndum Grænlendinga og Dana, engra annarra.
„Réttur til að stjórna eigin landi og virðing við landamærin eru grundvallaratriði alþjóðalaga,“ sagði hún og var þar að beina spjótum sínum að tilburðum Bandaríkjanna til að taka yfir Grænland.
