Beinn stuðningur við einkarekna fjölmiðla mun hækka verulega á næsta ári samkvæmt fjárlagafrumvarpinu. Framlög hækka úr 668,3 milljónum króna á þessu ári í 945,9 milljónir króna á því næsta.
Í upphafi stóð til að bæta 300 milljónum króna við þennan pott til að styrkja ritstjórnir einkamiðla. Eftir almenna sparnaðarkröfu ríkisins á málaflokkinn hljóðar raunveruleg hækkun upp á tæpar 278 milljónir króna.
Miklar sviptingar hafa verið á íslenskum fjölmiðlamarkaði síðustu ár. Fjölmiðlafyrirtækið Sýn hætti framleiðslu og útsendingu sjónvarpsfrétta í byrjun september. Þetta markaði lokin á 40 ára sögu sjónvarpsfrétta á Stöð 2 og Sýn.
Fyrir rúmum þremur árum lögðu Fréttablaðið og sjónvarpsstöðin Hringbraut upp laupana, eftir 22 ára sögu blaðsins.
Auglýsingakaup Íslendinga námu samtals 29,4 milljörðum króna 2024. Þar af runnu tæpir fimmtán milljarðar, 51 prósent, til alþjóðlegra tæknirisa eins og Google og META. Rúmir 14 milljarðar fóru til íslenskra fyrirtækja.
Dregið úr umsvifum RÚV á auglýsingamarkaði
Í fjárlagafrumvarpinu kemur fram að ríkissjóður ætli að nýta sérstaka heimild til að yfirtaka fjögurra milljarða króna skuldabréf RÚV. Þetta er gamalt lán sem tengist lífeyrisskuldbindingum starfsfólks og kostar RÚV um 285 milljónir króna í afborganir á hverju ári.
Til stendur að skerða leyfilegar auglýsingatekjur RÚV. Þannig á að draga úr samkeppni RÚV á auglýsingamarkaði og hleypa meira auglýsingafjármagni til einkarekinna fjölmiðla.
Útvarpsgjaldið hækkar
Til stendur að hækka útvarpsgjald um 5,2% til að fylgja verðlagsþróun.
Framlagið til RÚV verður þá 7.065 milljónir króna árið 2027. Árið 2026 var framlagið 6.735 milljónir.
Fjölmiðlanefnd fær líka örlitla hækkun. Framlag til nefndarinnar hækkar úr 123,3 milljónum króna í 126,4 milljónir króna árið 2027. Til stendur að verja þessum fjármunum í rannsóknir og fræðslu um netöryggi, stafræna færni og miðlalæsi í grunnskólum og hjá eldri borgurum.
