Konráð S. Guðjónsson hagfræðingur segir að þótt allir geti verið sammála um að verið sé að laga afkomuna þá megi lítið út af bregða. Áfram hækki skuldahlutfall ríkissjóðs og dregið sé úr fjárfestingum þegar það sé stöðnun í hagkerfinu.
Fjárlagafrumvarp næsta árs var kynnt í morgun. Stefnt er að hallalausum fjárlögum og reiknað með fimm milljarða króna afgangi. Meðal aðgerða er gjaldtaka á vinsælum ferðamannastöðum í eigu ríkisins, hækkun kílómetragjalds og hærri bankaskattur.
Of snemmt að fagna
Konráð segir of snemmt að fagna hallalausum ríkissjóði.
„Eins og óvissubilið sem er kynnt í frumvarpinu sýnir getur þetta brugðið til beggja vona. Það sem maður hefur kannski meiri áhyggjur af í því samhengi er hvernig staðan í hagkerfinu er. Hún er ekkert rosalega góð,“ segir hann.
Við séum hálfpartinn í stöðnun.
„Á þeim tíma þá er svolítið verið að forgangsraða í það að draga úr fjárfestingum sýnist manni. Maður hefði haldið að einmitt þá ætti að leggja áhersluna á að nýta svigrúmið í hagkerfinu til þess að fjárfesta.“
Lengri tíma horfurnar séu áhyggjuefni.
„Þó að bókhaldsleg afkoma sé lítillega jákvæð þá er undirliggjandi afkoman í gegnum það hvað ríkið þarf að taka að láni ennþá neikvæð og skuldahlutföllin hjá ríkinu eru ennþá að hækka, sem er náttúrlega kannski ekki sjálfbært til lengdar og eitthvað sem þarf að snúa við,“ segir Konráð.
„Menn búast við meiri verðbólgu á næsta ári“
Konráð segir aðgerðir yfirvalda eiga eftir að kynda undir verðbólgu þó að það gerist ekki strax.
„Við munum sjá það í janúar bæði þegar kílómetragjaldið, það kemur inn einhver 16% hækkun, og svo koma krónutöluhækkanirnar. Þá mun vísitala neysluverðs hækka um kannski 0,3% eða svo,“ spáir Konráð. „Það er greinilegt allavega hvernig markaður tók í það. Menn búast við meiri verðbólgu á næsta ári.“
Verðbólguálagið hafi hækkað aðeins í morgun.
„Það eru svona viss vonbrigði af því við sjáum náttúrlega hvað gerðist hérna í janúar, þegar hækkunin á vörugjöldunum og það kom fram. Það eru mjög neikvæð væntingaáhrif. Og verðbólga er svo háð væntingum að maður hefði búist við því að það væri farið varlegar í þetta,“ segir Konráð.
„Ég held að það væri skynsamlegt að draga úr þessu af því við erum í svo viðkvæmum punkti í því að reyna að ná verðbólgunni niður. Þessi leið til tekjuöflunar ríkissjóðs í því samhengi er ekki mjög heppileg, finnst mér.“
