Handbók um siðareglur ráðherra sker ekki úr um hvort Kristrún Frostadóttir forsætisráðherra megi eignast skammbyssuna sem Recep Tayyip Erdoğan, forseti Tyrklands, afhenti leiðtogum NATO að gjöf.
Reglurnar gefa þó skýrar vísbendingar um að ráðherrar eigi að fara varlega þegar verðmætar gjafir eru annars vegar.
Hvort Kristrún geti átt byssuna ræðst meðal annars af því við hvaða aðstæður hún var afhent, hvort hún var veitt henni sem persónu eða í krafti embættis hennar og hvers virði hún er.
Kristrún hefur sjálf haft orð á því að hún ætti helst heima á safni.
Í siðareglum ráðherra segir að ráðherra skuli gæta hófs við móttöku gjafa og þiggi „ekki verðmætar gjafir persónulega í krafti embættis síns“.
Gagnsæið sé skýrt
Reglurnar kveða þó ekki berum orðum á um að allar gjafir sem ráðherrar fá við opinber störf verði sjálfkrafa eign ríkisins eða að þeim beri að afhenda þær.
Þær leggja hins vegar áherslu á að ráðherrar þiggi ekki verðmætar persónulegar gjafir vegna embættis síns og að fyllsta gagnsæis sé gætt.
Í skýringum með siðareglunum segir jafnframt að ráðherrar ættu almennt ekki að þiggja gjafir eða önnur fríðindi frá hagsmunaaðilum. Undantekningar geti þó átt við ef tilefnið sé skýrt, gjöfin hafi óverulegt verðgildi eða teljist fyrst og fremst táknræn.
Áletrunin flæki málið
Ekki liggur fyrir hvert verðmæti byssunnar er. Hún var afhent öllum leiðtogum NATO í lok leiðtogafundar bandalagsins og verður því að teljast opinber og táknræn gjöf.
Á byssunni er þó grafið nafn Kristrúnar og var gjöfin þannig sérsniðin fyrir hana. Sú staðreynd gæti flækt matið á því hvort líta beri á byssuna sem persónulega gjöf eða gjöf sem veitt var í krafti embættis forsætisráðherra.
