Milljónir brjóstakrabbameinssjúklinga á heimsvísu gætu sloppið við hefðbundna krabbameinslyfjameðferð. Þetta gefa niðurstöður nýrrar alþjóðlegrar rannsóknar til kynna. Teymi við Lundúnaháskóla, UCL, stóð að rannsókninni sem náði til sex landa.
Yfir 4400 nýgreindir einstaklingar yfir fertugu, með svokallað hormónajákvætt brjóstakrabbamein, tóku þátt í rannsókninni. Notast var við erfðapróf sem kallast Prosigna til að meta líkurnar á að krabbameinið tæki sig upp aftur að lokinni skurðaðgerð.
Lífslíkur aukast lítið með lyfjameðferð fyrir ákveðinn hóp
Skurðaðgerð er vanalega sú meðferð sem notast er við gegn brjóstakrabbameini og í kjölfarið er oft notast við lyfjameðferð til að draga úr líkum á að meinið taki sig upp að nýju. Einnig þegar meinið hefur dreifst í eitla.
Um tveir þriðju þátttakenda fengu lága áhættueinkunn og fengu því andhormón sem eftirmeðferð, en þurftu ekki lyfjameðferð. Fimm árum síðar voru 93,7% þátttakenda enn á lífi, samanborið við 94,9% hjá þeim sem fengu lyfjameðferð.
Kostur að geta stækkað hópinn sem þarf ekki lyfjameðferð
„Þetta eru mjög áhugaverðar niðurstöður. Við erum alltaf að reyna að finna þá sjúklinga sem hafa gagn af meðferðinni og ef við getum stækkað hópinn sem ekki hefur þörf á krabbameinslyfjameðferð þá er það kostur,“ segir Ólöf Kristjana Bjarnadóttir, sérfræðingur í krabbameinslyflækningum á Landspítalanum.
Lyfjameðferðin þung en andhormónalyfjum fylgja líka aukaverkanir
Lyfjameðferð hefur oftast talsverð áhrif á lífsgæði fólks og getur valdið ógleði, orkuleysi, hármissi, frjósemisvandamálum og veikt ónæmiskerfið.
„Krabbameinslyfjameðferð hefur ýmsar aukaverkanir og er mjög þung meðferð,“ segir Ólöf. En andhormónameðferð standi yfir í lengri tíma og henni fylgja líka aukaverkanir. „En ekki eins miklar aukaverkanir og krabbameinslyfjunum,“ segir Ólöf.
„En það er mjög mikilvægt að þeir sem hafa greinst með brjóstakrabbamein taki þessi andhormónalyf sem er ráðlagt að taka - og alveg í fimm til tíu ár,“ segir hún.
Notast við sömu erfðapróf hér á landi til að meta þörf á lyfjameðferð
Síðustu þrjú ár hefur verið notast við þetta sama erfðapróf og notað var í rannsókninni til að meta þörf á lyfjameðferð. Sýni eru þá send til Danmerkur í greiningu.
„Þá erum við einmitt að reyna að finna, í hópi nýgreindra brjóstakrabbameina sem eru hormónajákvæð, hverjir hafa gagnsemi af lyfjakrabbameinsmeðferðinni og hverjir hafa minna gagn af henni,“ segir Ólöf.
„Að minnsta kosti líður okkur betur með að sleppa krabbameinslyfjameðferð þegar þetta próf styður við það að viðkomandi er í lágri áhættu á endurkomu.“ segir hún.
„En á sama tíma fáum við stundum meiri staðfestingu á því að rétt sé að gefa krabbameinslyfjameðferð því að viðkomandi sjúklingur er í meiri áhættu á endurkomu,“ segir Ólöf.
