„Það er sérstök aðferðafræði í þessu að skapa sundrungu og láta hlutina kosta peninga. Einn lítill dróni getur truflað flugumferð um Keflavíkurflugvöll,“ segir Sólrún H.G. Proppé við Morgunblaðið.
Hún er í hópi höfunda nýrrar skýrslu Vörðu sem unnin er í samráði við Cornell-háskóla í Bandaríkjunum.
Ógn sem kann að stafa af drónum hérlendis er af ýmsum toga samkvæmt skýrslunni. Evrópulönd hafa á undanförnum árum mátt þola truflanir vegna drónaumferðar á flugvöllum sem hefur haft í för með sér tímabundnar lokanir.
Efla þarf valdheimildir lögreglunnar og fjármagn til sérsveitar ríkislögreglustjóra til að ráða á þessu bót, að því er Kristinn Árni L. Hróbjartsson, meðhöfundur skýrslunnar, segir við Morgunblaðið. Hann telur upplýsingaöflun og njósnir vera eina hugsanlega birtingarmynd erlendrar íhlutunar með drónum. „Það er fólk með sérþekkingu inni í viðbragðskerfunum okkar en það er hola í kerfinu hvað varðar skýrar ábyrgðarkeðjur um hver geti tekið hvers konar ákvarðanir í ákveðnum aðstæðum og hvað megi gera í þeim aðstæðum.“
Hryðjuverkamálið svokallaða er til umfjöllunar í skýrslunni, en þar er sagt að dómskjöl í málinu fjalli um meint samtöl hinna grunuðu um notkun dróna í meintum hryðjuverkaáformum.
Höfundar skýrslunnar segja í henni að viðmælendur þeirra hafi verið sammála um að innlend ógn af drónum væri ekki síður eftirtektarverð en erlend.
Lesa má nánar um málið á bls.20 í Morgunblaðinu í dag
