Arnar Þór Jónsson gagnrýnir notkun VAR (Video Assistant Referee) í knattspyrnu og segir tæknina vera að eyðileggja íþróttina.
Í færslu á Facebook segir Arnar að dómarinn sé enn sýnilegur inni á vellinum, en að raunverulegt vald yfir stærstu ákvörðunum hafi færst til „skuggadómara“ sem sitji við tölvuskjái fjarri leikvellinum.
Telur kerfið bjóða upp á spillingu
Að mati Arnars felst stærsti gallinn í því að ákvarðanir séu teknar af einstaklingum sem áhorfendur sjái ekki og þurfi ekki að svara beint til ábyrgðar.
Hann segir að ef þeir sem stjórni VAR ákveði fyrirfram að annað liðið skuli njóta vafans geti það haft úrslitaáhrif á leikinn. Þá geti fjárhagslegir hagsmunir og möguleg hagsmunatengsl skapað aðstæður þar sem óprúttnir aðilar geti keypt sér áhrif.
Vísar til umdeilds marks Englendinga
Sem dæmi nefnir Arnar leik Englands og Noregs um helgina þar sem jöfnunarmark Englendinga vakti miklar deilur.
Samkvæmt umfjöllun Morgunblaðsins virtist boltinn snerta vír sem heldur uppi myndavél áður en England hóf sókn sem endaði með marki Jude Bellingham. FIFA sagði hins vegar að skynjari í boltanum hefði ekki greint neina snertingu og því hefði ekki verið hægt að sanna að boltinn hefði farið í vírinn. Markið var því látið standa.
Arnar bendir á að atvikið hafi verið til umræðu í HM stofu RÚV þar sem meðal annars var rætt hvort boltinn hefði í raun snert vírinn.
Tengir gagnrýnina við ESB
Í lok færslunnar tengir Arnar umræðuna um VAR við þjóðaratkvæðagreiðsluna um aðild Íslands að Evrópusambandinu sem fram fer 29. ágúst.
Hann segir kjósendur standa frammi fyrir vali um hvort þeir vilji að „sérfræðingar sem sitja við tölvuskjái fjarri Íslandi “ taki ákvarðanir um mikilvæga hagsmuni Íslands, semji reglur og túlki þær.
Að hans mati er mikilvægt að valdhafar séu sýnilegir og beri ábyrgð gagnvart almenningi. Hann bendir á að hægt sé að skipta út óhæfum dómurum og kjósa óhæfa stjórnmálamenn frá völdum, en telur mun erfiðara að losna við „skuggastjórnendur“.
Arnar lýkur færslunni á því að hvetja þá sem vilji gagnsætt stjórnarfar og skýra ábyrgð valdhafa til að segja nei í þjóðaratkvæðagreiðslunni 29. ágúst.
