Hjónin Charley Ray og Martha Jean Harris, sem búsett voru í Joelton í Tennessee, létust mánudaginn 17. maí á sjúkrahúsi í Nashville. Þau fóru yfir móðuna miklu með aðeins 42 mínútna millibili, haldandi í hendur hvors annars, eftir 65 ára farsælt hjónaband, samkvæmt WKRN 2 news í Nashville.

Hjónin, sem kynntust tólf ára gömul og giftust tæplega tvítug, lögðust inn á sjúkrahúsið fyrr í mánuðinum vegna ólíkra heilsubresta. Upphaflega lágu þau á sitthvorri deildinni, en þegar heilsu þeirra hrakaði tók starfsfólk sjúkrahússins þá ákvörðun að færa þau saman inn á sömu stofu.

Að sögn sonar þeirra var Charley fluttur að sjúkrabeði Mörthu skömmu fyrir andlát hennar. Hún lést á meðan þau héldust í hendur. Charley sleppti ekki takinu og lést sjálfur tæpri klukkustund síðar. Charley var 85 ára gamal en Martha 84 ára.

Í sameiginlegri minningargrein um hjónin var þeim lýst sem óaðskiljanlegum hjónum, og andlát þeirra sagt endurspegla þá djúpu tryggð sem einkenndi líf þeirra allt frá æsku.