Komum minni skemmtiferðaskipa eða svokallaðra leiðangursskipa, sem stoppa aðallega í smærri höfnum víðs vegar um landið, hefur fækkað á þessu ári. Bókanir fyrir næstu tvö ár eru í algjöru lágmarki og hefur það töluverð áhrif á ferðaþjónustuna á landsbyggðinni. Innviðagjaldið sem var sett á með skömmum fyrirvara um áramótin hefur áhrif sem og nýjar reglur um að leiðangursskipin sem sigli innan íslenskrar lögsögu séu virðisaukaskattskyld.
„Við höfum séð talsverða truflun í komum leiðangursskipa undanfarin ár eftir að nýju skattarnir og gjöldin voru sett á,“ segir Hans Braas, svæðisstjóri Norðurlandaþjóða fyrir alþjóðasamtök skemmtiferðaskipa, CLIA. Hann segir að Ísland sé eina þjóðin í Evrópu þar sem skipakoma minnki, alls staðar annars staðar sé fjölgun. Hægt sé að rekja það beint til nýrra gjalda og skatta sem innheimt eru af skipunum. Íslendingar verði að átta sig á að þeir séu í samkeppni við allan heiminn um komu þessara skipa og staðan sem upp sé komin hérlendis sé einstök.
„Íslendingar verða að átta sig á því að þeir eru í samkeppni við allan heiminn um komu þessara skipa.“
Enn hægt að bjarga því sem bjargað verður
Sigurður Jökull Ólafsson, framkvæmdastjóri Cruise Iceland, fór hringferð um landið með fulltrúum frá CLIA í síðustu viku og hitti sveitarstjórnarfólk og hafnarstarfsfólk. Hann segir stöðuna alvarlega en telur að enn sé hægt að bjarga því sem bjarga verður með því að snúa við reglum um tolla og hafa meiri fyrirsjáanleika í innheimtu gjalda. Skemmtiferðaskip bóki sig mörg ár fram í tímann. Innviðagjaldið var sett á með skömmum fyrirvara um áramótin.
„Hvað varðar leiðangursskipin þá erum við að vonast til þess að tollfrelsið sé þá fullt tollfrelsi og vaskundanþága þessa fjóra mánuði. Þau sjá hag sinn að hafa skip sín hérna og viðskiptavinirnir ánægðir. Þá getum við fengið það til baka, það tekur samt einhver ár. Það sem við gerum núna hefur áhrif tvö, þrjú, fjögur, fimm, tíu ár fram í tímann.“
