Kröfu um auglýsingu starfsleyfis og fjögurra vikna umsagnatíma hefur verið létt af öllum flokkum atvinnustarfsemi sem heilbrigðisnefnd gefur út starfsleyfi fyrir. Breytingin nær meðal annars til gististaða, brugghúsa, skólahúsnæðis, sund- og baðstaða, dvalarheimila, æfingasvæða slökkviliðs, sjúkrastofnana og þvottahúsa.
Í tilkynningu á vef Stjórnarráðsins segir að breytingin leiði af frumvarpi umhverfis-, orku- og loftslagsráðherra um breytingar á lögum nr. 7/1998 um hollustuhætti og mengunarvarnir sem samþykkt var á Alþingi 19. júní síðastliðinn. Ráðherra hefur nú fylgt lagabreytingunni eftir með breytingu á reglugerð.
Heimildin er tímabundin í ljósi þess að heilbrigðisnefndir sveitarfélaga verða lagðar niður um áramót. Með heimildinni er heilbrigðisnefndum strax heimilt að gefa út eða breyta starfsleyfum fyrir atvinnurekstur án þess að auglýsa tillögu eða drög að breytingu á starfsleyfi og veita frest til athugasemda.
Heimilt að auglýsa og veita umsagnarfrest megi ætla að starfsemin hafi veruleg grenndaráhrif
Heilbrigðisnefndum er þó heimilt að viðhafa slíka málsmeðferð ef ætla má að starfsemin geti haft veruleg grenndaráhrif, svo sem ef hún fellur undir lög um umhverfismat framkvæmda og áætlana.
Um áramót taka gildi breytingar á framkvæmd heilbrigðiseftirlits. Færist þá útgáfa starfsleyfa samkvæmt lögunum til Umhverfis- og orkustofnunar sem verður heldur ekki skylt að auglýsa starfsleyfi í fjórar vikur áður en það er gefið út.
„ Þetta er enn eitt skrefið sem núverandi ríkisstjórn tekur til þess að vinda ofan af íþyngjandi kröfum sem lagðar voru á fólk og fyrirtæki á undanförnum árum,“ er haft eftir Jóhanni Páli Jóhannssyni, umhverfis-, orku- og loftslagsráðherra.
