Armenar ganga að kjörborðinu á morgun undir miklum efnahagslegum þrýstingi frá Rússum. Forsætisráðherra landsins freistar þess að vera endurkjörinn og styrkja tengslin við Evrópu enn frekar.
Sambandið súrnaði eftir Nagorno-Karabakh
Rússland er stærsta viðskiptaþjóð Armeníu og samband þeirra á milli hefur verið náið áratugum saman, enda var Armenía hluti af Sovétríkjunum. Eftir að Aserbaísjan tók yfir stjórn héraðsins Nagorno-Karabakh 2023, með þeim afleiðingum að yfir hundrað þúsund Armenar flúðu, tók sambandið að súrna.
Armenum þótti, mörgum hverjum, viðbrögð Rússa við því skipta sköpum. Þrátt fyrir öryggissamstarf Rússa og Armena, meðal annars með rússneskum friðargæsluliðum í Nagorno-Karabakh, stóðu þeir ekki í vegi fyrir Aserum.
Nikol Pashinyan, forsætisráðherra Armeníu, tók fyrst við embættinu 2018. Síðan þá hefur hann reynt að stýra landinu frá Rússlandi og í átt að Vesturlöndum. Hann hefur meðal annars samþykkt lög til sem gera þjóðinni kleift að sækja um aðild að Evrópusambandinu og flýtt fyrir friðarviðræðum við Asera með milligöngu Bandaríkjanna. Og þar með unnið hrifningu Donalds Trumps Bandaríkjaforseta.
Pashinyan reitti stjórnvöld í Moskvu enn frekar til reiði í apríl þegar hann hélt leiðtogafund Evrópska stjórnmálasamfélagsins, European Political Community, þar sem Volodymyr Zelensky Úkraínuforseti var meðal annars gestur.
Rússar takmarka innflutning á armenskum vörum
Rússnesk stjórnvöld hafa undanfarna mánuði takmarkað innflutning á ýmsum armenskum vörum, meðal annars áfengi, fiski og ávöxtum. Breski fjölmiðillinn The Guardian heimsótti koníakverksmiðjuna Abovyan í Yerevan, höfuðborg landsins.
Rússar tilkynntu í síðasta mánuði að innflutningur á vörum frá Abovyan væri bannaður. Bannið náði einnig yfir tvo aðra áfengisframleiðendur í landinu. Opinberlega var ástæðan áhyggjur af hreinlæti en fólk taldi að pólitískur þrýstingur væri aðalástæðan. Tilgangurinn var að draga úr áhuga landsins á vestrænum samskiptum fyrir kosningarnar.
„Við vonum bara að þetta gangi yfir,“ sagði Samvel Goroyan, forstjóri Abovyan við The Guardian.
Allt koníak fyrirtækisins er selt í Rússlandi, sjö milljón flöskur á ári. „Við getum ekki snúið okkur annað.“
Sama taktík og í Moldóvu og Ungverjalandi
Þrátt fyrir stefnu Pashinyan síðustu ár hefur stuðningur við hann minnkað frá 2021, þegar hann var 54 prósent. Núna er hann um 30 prósent.
Greinendur segja Rússa reyna að nota sömu taktík í Armeníu og bæði Moldóvu og Ungverjalandi, falsfréttaherferðir og leyniaðgerðir, til að reyna að hafa áhrif á almenning. Í síðasta mánuði varaði Vladimír Pútín Rússlandsforseti Armena við því að landið gæti staðið frammi fyrir „úkraínskri atburðarás“ haldi það áfram að styrkja sambandið við Evrópu.
Stjórnvöld í Moskvu hafa stutt helsta keppinaut Pashinyans, Samvel Karapetyan sem er rússnesk-armennskur milljarðamæringur. Hann er í stofufangelsi og hefur verið ákærður fyrir tilraun til valdaráns.
