„Eftir banaslysið árið 2007 voru settar upp auknar merkingar eins og rannsóknarnefnd samgönguslysa hafði lagt til,“ segir í svari Vegagerðarinnar við fyrirspurn Heimildarinnar vegna skorts á beygjumerkingu á Krýsuvíkurveginum þar sem banaslys ungmenna varð aðfaranótt mánudags.

Heimildin greindi frá því að annað umferðarslys hefði orðið á nákvæmlega sama vegkafla á Krýsuvíkurveginum árið 2007. Þá lést vélhjólamaður sem ók á miklum hraða. Sá lést einnig þegar hann endaði á steini sem er utan vegar um miðbik beygjunnar.

Segja blátt skilti varar við varasömum aðstæðum

Í niðurstöðu Rannsóknarnefndar umferðarslysa (RNU) sagði að merkingum um hættulega beygju hefði verið ábótavant auk þess sem það þyrfti að lækka hámarkshraða á svæðinu. Engar merkingar er að finna um beygjuna enn í dag, en öðrum fyrirmælum var fylgt eftir samkvæmt tilmælum RNU, auk þess sem varað er við gatnamótum Bláfjallaafleggjara.