Sumarið er komið en það verður kaldur vorbragur á landinu næstu daga. Köld norðanátt verður ríkjandi á landinu og blæs nokkuð um landsmenn. Gæðunum verður þó misskipt því útlit er fyrir él á Norður- og Austurlandi í dag og vorhret næstu daga en bjartara verður sunnan til.
Hlýjast verður sunnanlands en þó aðeins um sjö stig svo það er kannski ekki kominn tími fyrir stuttbuxur og stuttermaboli.
Útlit er fyrir að það hlýni um helgina en þá gæti rignt sunnan- og vestan til.
Veðurspáin er svohljóðandi:
Norðan 5-10 m/s í dag, en norðvestan 10-15 austanlands. Él á Norður- og Austurlandi og hiti nærri frostmarki, en léttskýjað sunnan heiða með hita að 7 stigum.
Norðlæg átt á morgun, víða 5-13. Él norðan- og austantil og einnnig um tíma allra syðst seinnipartinn. Annars þurrt að kalla. Hiti breytist lítið.
