Íran hefur hafið flugskeyta- og drónaárásir að norðanverðu Ísrael í kjölfar þess að ísraelski herinn gerði loftárásir á suðurhluta Beirút í Líbanon fyrr í dag. Ísraelski herinn segir loftvarnakerfi landsins hafa stöðvað öll flugskeyti sem skotið var að landinu hingað til. Breska ríkisútvarpið greinir frá.
Benjamín Netanjahú forsætisráðherra Ísraels sagði að árásirnar hefðu beinst að „höfuðstöðvum hryðjuverkasamtaka“ í Dahieh-hverfinu í Beirút og væru svar við flugskeytaárásum Hezbollah á ísraelskt yfirráðasvæði. Hezbollah hefur staðfest að hafa skotið á herstöðvar Ísraels.
Í yfirlýsingu frá íranska byltingarverðinum kemur fram að árásin sé viðvörun til Ísraelshers vegna loftárása þeirra á Líbanon. Þar er jafnframt hótað frekari árásum á bæði ísraelsk og bandarísk skotmörk á svæðinu verði árásir á Íran eða bandamenn þeirra endurteknar.
Hundrað dagar eru liðnir frá því að stríðið milli Ísraels og Írans hófst. Þrátt fyrir vopnahlé sem tók gildi í apríl hafa átök haldið áfram með reglubundnum árásum.
Árásirnar „alvarleg mistök“
Donald Trump Bandaríkjaforseti hefur verið upplýstur um árásir Írans. Hann hvatti Írani til að snúa aftur að samningaborðinu: „Þið hafið skotið eldflaugum ykkar. Það er nóg. Komið aftur að borðinu og gerið samkomulag.“ Talsmaður Ísraelshers, Effie Defrin, segir að írönsk stjórnvöld hafi gert „alvarleg mistök“ með árásunum.
