Tveir ungir menn lögðu líf sitt í hættu þegar þeir fóru án leyfis og öryggisbúnaðar yfir klettastíginn í Fálkaklettum við Esjurætur í nótt.
Stígurinn er á vegum Fjallafélagsins. Haraldur Örn Ólafsson, eigandi Fjallafélagsins, segir að hann vilji alls ekki þetta verði fyrirmynd að fleiri glæfraferðum.
„Það eru kannski margir sem vita ekki hvað þetta er, en það er rosalega mikilvægt að vera með réttan öryggisbúnað í þessu ævintýri. Við erum búin að fara með á annað þúsund manns í leiðina og allir rosa glaðir og allir öryggir en þarna kom upp atvik þar sem menn fóru um miðja nótt með engan öryggisbúnað og greinilega mjög illa búnir. Þeir fóru greinilega alla leiðina og það eru mjög hættulegir kaflar í henni.“
Stígurinn er svokallaður via ferrata-stígur þar sem lagðir eru vírar í kletta og brú sett á milli. Svona stígar eru vinsælir um allan heim og er mikilvægt að vera í réttum öryggisbúnaði.
Biðlar til fólks að bera virðingu fyrir eigin öryggi
Haraldur biðlar til fólks að bera virðingu fyrir svæðinu, eigin öryggi og eigin lífi og allri þeirri þrotlausu vinnu sem hefur farið í þetta verkefni.
„Þetta er búið að taka mörg ár og er gríðarlega stórt og mikið verk. Tilgangurinn er að allir séu öryggir og allir komi glaðir og heilir heim. Þannig að við verðum bara að gefa út þessi skilaboð að í guðanna bænum ekki gera þetta án öryggisbúnaðar og vanbúin. Það þarf líka leyfi til þess að fara og nota allan þennan búnað sem búið er að setja upp.“
Haraldur heldur að ungu mennirnir hafi áttað sig á hættunni sem þeir stofnuðu sér í en hann beinir spjótum sínum ekki beint að þeim í þessu máli.
„Ég var einu sinni ungur og vitlaus og gerði margt heimskulegt, þannig að ég er ekki endilega að beina spjótum mínum beint að þeim heldur bara að framtíðinni. Bara í guðanna bænum ekki endurtaka þetta, bara til alls fólks, hvort sem það er ungt eða gamalt, ekki fara þarna án öryggisbúnaðar.“
Skapar meiri hættu að fjarlægja hluta af leiðinni
Fyrirtækið sem stendur fyrir brúnni hafði haft áhyggjur af því að svona atvik gæti komið upp í kjölfar uppsetningu hennar. Svipuð tilvik hafi komið upp áður en þá hafi fólk yfirleitt verið með einhvers konar búnað og lítið mál gert úr því.
„Þetta var töluvert alvarlegra atvik og við höfum alveg velt fyrir okkur hvort við eigum að fjarlægja hluta af leiðinni þannig að hún sé óaðgengileg en það getur gert jafnvel meiri hættu. Þetta er bara víða þar sem hægt er að koma sér í hættu og þessi staður er ekkert öðruvísi en aðrir og það þarf bara að umgangast þennan stað eins og aðra þar sem geta verið alls konar hættur á ferðinni,“ segir Haraldur að lokum.
