Valdaskiptin í Stjórnarráðshúsinu og Ráðhúsi Reykjavíkur segja mikla sögu.

Þriggja flokka ríkisstjórn tók við völdum 21. desember 2024. Í henni sitja ráðherrar frá flokkum sem ekki höfðu átt fulltrúa í ríkisstjórn árum eða áratugum saman og einn sem fékk í fyrsta sinn ráðherra. Miðað við það sem sagt var í baráttunni fyrir alþingiskosningarnar 30. nóvember 2024 hefði mátt ætla að ríkisstjórn með nýjum flokkum myndi strax stíga umbótaspor.

Reynslan sýnir því miður annað. Í dag (26. júní) berast enn fréttir um hækkun verðbólgu. Jón Ólafur Halldórsson, formaður Samtaka atvinnulífsins, segir hagkerfið halda áfram að kólna en samt hækkar verðbólgan. Frétt um viðtal við hann í Morgunblaðinu 25. júní bar fyrirsögnina: Botnfrosnar væntingar um efnahag.

Verst er að allar viðvaranir fara inn um annað eyrað og út um hitt hjá ríkisstjórninni. Hún lifir á eigin plani og berst fyrir aðild Íslands að ESB án þess að þora að viðurkenna það.

Kristrún Frostadóttir forsætisráðherra þorði ekki heldur að ganga markvisst til verks við hagræðingu þegar hún tók við embætti sínu. Í áramótaávarpi 31. desember 2024 biðlaði hún til almennings og bað hann um tillögur um hagræðingu. Mikið var gert með þessi tilmæli og um 10.000 tillögur bárust.

Nú er augljóst að hér var fyrst og fremst um áróðursumbúðir að ræða, liður í blekkingarstjórnmálum sem eru helsta einkenni Samfylkingarinnar. Þessi stjórnmál hafa ráðið í ráðhúsinu undanfarna áratugi og hlaðið upp skuldum.

Formenn borgarstjórnarflokkanna.

Nýr meirihluti tók við völdum í borgarstjórn Reykjavíkur 2. júní 2026 eftir góðan sigur Sjálfstæðisflokksins í kosningunum 16. maí 2026 undir kjörorðinu STRAX.

Hildur Björnsdóttir hlaut umboð til að leiða meirihlutastjórn sem hún myndaði með Viðreisn og Framsóknarflokki. Þriggja flokka stjórnin í ráðhúsinu gengur betur og skipulegar til verks en þriggja flokka stjórnin í stjórnarráðshúsinu.

Borgarráð ákvað 25. júní, að tillögu Hildar Björnsdóttur, að gera umfangsmiklar skipulagsbreytingar á skrifstofu borgarstjóra og borgarritara, en í þeim felst m.a. að lagðar verði niður stöður 18 manns á skrifstofu samskipta og viðburða og mannréttindaskrifstofu.

Borgarstjóri segir að með þessu gefi hún sviðsstjórum innan borgarkerfisins fordæmi um hvernig þeir skuli ganga fram við að sýna ráðdeild í rekstri. Hildur kallar ekki eftir hugmyndum sem síðan er bara flaggað í frægðarskyni á fréttamannafundum heldur gengur hún sjálf í verkið.

Samhliða uppstokkun á skipulagi ákvað borgarráð 25. júní að farið skyldi í saumana á samningum Reykjavíkurborgar um

bensínstöðvalóðir en lögfræðileg rýni borgarlögmanns á þeim bendir til þess að við gerð þeirra hafi verið brotið gegn reglum um ríkisaðstoð og samkeppni. Þessum samningum lýsti Samfylkingin sem einu af meistarastykkjum Dags B. Eggertssonar.

Mikil leynd hvíldi og hvílir enn yfir þessari samningsgerð Dags B. Þoli hún ekki dagsljósið er það eitt en sé henni haldið leyndri til að hylma yfir lagabrot og brot á EES-samningnum verður að upplýsa um pólitísku ábyrgðina.