Bændasamtökin hafa boðað til aukabúnaðarþings 14. ágúst vegna þjóðaratkvæðagreiðslunnar í lok ágúst um framhald viðræðna við Evrópusambandið. Formaður Bændasamtakanna segir þetta risastórt pólitískt verkefni og að ráðamenn þjóðarinnar hafi ekki útskýrt af hverju farið sé af stað í þessa vegferð um hásumar.
Engu hefði breytt að hafa atkvæðagreiðslu síðar
Hanna Katrín Friðriksson, atvinnuvegaráðherra, segir þjóðaratkvæðagreiðsluna í ágúst ekki snúast um aðild eða aðlögun að Evrópusambandinu heldur hvort þjóðin vilji taka skref áfram eða afturábak. Hún segir andstöðu Bændasamtakanna byggjast á ótta og óvissu um hvað geti orðið. Engu hefði breytt þótt atkvæðagreiðslan hefði verið síðar.
„Ég hefði haldið að forysta Bændasamtakanna af öllum myndi einmitt vilja fá eins skýrt fram og kostur er hver staða íslensks landbúnaðar yrði innan Evrópusambandsins hvernig við getum mætt þeim áskorunum sem aðild hefði í för með sér og hvernig við getum nýtt okkur þau fjölmörgu tækifæri sem aðild hefði í för með sér,“ segir Hanna Katrín Friðriksson, atvinnuvegaráðherra.
Ekkert að óttast við að segja já í ágúst
Formaður Bændasamtakanna segir mörgum spurningum ósvarað en ráðherra er ósammála því, svörin fáist ekki nema þjóðin segi já í ágúst. Ef ekki komi já haldi menn áfram að giska á hvað hefði getað orðið.
„Þetta byggist á einhverjum ótta um hvað verður, óvissu, en við eyðum ekki óvissunni nema að fá að vita hvað getur orðið,“ segir Hanna Katrín.
Ráðherra segir ekkert að óttast við að segja já í ágúst. Það hefði engu breytt þótt þjóðaratkvæðagreiðslan hefði verið haldin síðar á árinu.
„Ég er þeirrar skoðunar að þetta sé ekki mál sem á að útkljá á þingfundum, þess vegna er þetta þjóðaratkvæðagreiðsla en ekki frumvarp inni á þingi þar sem 63 þingmenn taka afstöðu, þetta er þjóðaratkvæðagreiðsla, þjóðin er til staðar, hún er hér, það er lífleg umræða í gangi.“
Ráðherra segir þjóðaratkvæðagreiðsluna ekki snúast um aðild eða aðlögun að ESB.
„Hún snýst bara um það, ætlum við að taka skref áfram eða afturábak.“
