Rannsóknargögn úr virkri rannsókn héraðssaksóknara birtust í kynningarmyndbandi ísraelska hugbúnaðarfyrirtækisins Cellebrite. Myndbandið var birt á YouTube. Í því mátti greina, af skjá starfsmanns héraðssaksóknara, nöfn fimm einstaklinga auk málsnúmers sem gaf til kynna að rannsóknin hefði hafist hjá Lögreglunni á höfuðborgarsvæðinu í fyrra.
Morgunblaðið greindi fyrst frá málinu. Vísir fjallaði í vikunni um kynningarmyndband Cellebrite. Það hefur nú verið tekið niður.
Ólafur Þór Hauksson héraðssaksóknari segir í viðtali við fréttastofu að nöfn þeirra einstaklinga sem birtust í myndbandi Cellebrite hafi tengst annarri rannsókn en þeirri sem er til umfjöllunar í kynningarmyndbandinu. Það mál er kennt við þvottabjörn og heitir Operation Racoon. Þeirri rannsókn er lokið.
Hann segir að sennilega hafi það verið verktakar á vegum Cellebrite sem komu og mynduðu innan veggja embættisins.
„Ég bara hreinlega segi alveg eins og er: Þetta er atvik sem kom upp sem átti alls ekkert að eiga sér stað. Ég held að í ljósi þessa verði að fara yfir allt verklag í sambandi við viðtöl sem við veitum hér eftir. Sennilega munum við ekki veita myndatökur innan veggja vinnustaðarins,“ segir Ólafur Þór.
Engin persónugreinanleg gögn áttu að vera á tölvuskjám
Héraðssaksóknari hefur átt í óformlegum samskiptum við dómsmálaráðuneytið vegna málsins. Dómsmálaráðuneytið segir málið ekki á borði þess. Dómsmálaráðherra hafi óskað eftir upplýsingum frá embætti héraðssaksóknara um tilurð og aðdraganda kynningarefnisins.
„Dómsmálaráðherra hefur ekki afskipti af einstökum ákvörðunum sjálfstæðra embætta lögreglu og ákæruvalds um kaup á búnaði eða þjónustu,“ segir í svari ráðuneytisins við fyrirspurn fréttastofu.
Ólafur Þór segir að það hafi verið brýnt fyrir Cellebrite að engin persónugreinanleg gögn yrðu í myndbandinu. Hans skilningur hafi verið að kynningarmyndbandið væri ætlað til notkunar til að kynna starf fyrirtækisins innanhúss en ekki á opinberum vettvangi.
Farið var yfir vinnustöðvar starfsmanna héraðssaksóknara fyrir upptökur á myndbandinu í því skyni að tryggja að engin trúnaðargögn væru á skjám á meðan á þeim stóð.
„Við munum fara yfir málið hér innandyra og skoða það mjög vel, hvernig þetta gerðist,“ svarar Ólafur Þór spurður um hvort gripið hafi verið til einhverra ráðstafana vegna starfsmannsins sem hafði gögnin á skjá sínum.
„Við gerðum strax athugasemd um leið og okkur varð þetta ljóst og gerðum kröfur um tafarlausar úrbætur í ljósi þess að búið var að brýna á þessu atriði sérstaklega.“
Þjónusta embættið við að ná gögnum af símum
Cellebrite sérhæfir sig í stafrænum rannsóknarlausnum.
„Þeir eru með hugbúnað sem embættið notar til þess að afrita síma og kanna innihald á símum sem eru haldlagðir í þágu rannsóknarmála,“ segir Ólafur Þór.
„Auðvitað er það þannig að tækninni fleygir mjög hratt fram. Til að við getum unnið með síma þurfum við að vera með hugbúnað sem er stöðugt uppfærður til þess að taka á nýrri tækni í sambandi við síma.“
Hugbúnaður Cellebrite hafi reynst árangursríkur.
Fréttastofa spurði Ólaf Þór hvort sérstaklega hefði þurft að huga að öryggissjónarmiðum í ljósi þess að ísraelsk fyrirtæki og stjórnvöld eru framarlega í eftirlitstækni.
„Við eigum þessi viðskipti fyrst og fremst við þá í tengslum við hversu árangursríkar eða notadrjúgar þeirra hugbúnaðarlausnir eru. En auðvitað fylgjumst við með hver afstaða stjórnvalda er... í raun og veru hafa íslensk stjórnvöld ekki sett einhverjar takmarkanir við viðskipti við félög af þessu tagi og af þessu þjóðerni.“
