Jón Magnússon skrifar:
Klerkastjórnin í Íran hefur um árabil samið við Bandaríkin o.fl. um að kjarnorka þeirra verði einungis til friðsamlegra nota. Alla samninga hafa þeir svikið áður en blekið á undirskriftinni þornaði.
Samningaviðræður Bandaríkjanna og Íran fóru út um þúfur í nótt þar sem að Íranir blekkja Trump og Vance ekki eins auðveldlega og Biden og Obama á árum áður.
Klerkastjórnin í Íran heldur úti herjum m.a. Hamas á Gasa, Hesbollah í Líbanon. Það er til marks um tök hennar á fréttamiðlum Vesturlanda, að stöðugar fréttir eru básúnaðar út af mannfalli Hamas og Hesbollah og meintum hryðjuverkum Ísrael.
En þegar Írönsk stjórnvöld lokuðu á internetið og frömdu hryllileg fjöldamorð á írönskum borgurum þar sem sennilega fleiri voru drepnir af byltingarverði Íran en fallið hafa alls á Gasa og Líbanon, þá minnast vestrænir fréttamiðlar varla á það. Látið er eins og það hafi ekki gerst.
Það væri e.t.v. við hæfi að einhver þingmaður vekti máls á þessu sérkennilega fréttamati en í því efni er RÚV fjarri því að vera undanskilið.
Þeim mun meira er gert úr ónytjuorðum sem Trump lét falla og hafa verið rofin töluvert úr samhengi að menning Írana yrði eyðilögð. Öllum má ljóst vera að það er ekki stefna Bandaríkjanna eða Vesturlanda og þau mundu hvort eð er ekki geta það þó þau reyndu.
Virkasti aðilinn sem hefur staðið fyrir því að reyna að eyðileggja þúsunda ára þjóðmenningu í Íran áður Persíu er klerkastjórnin sem nú situr við völd.
Fyrir 2.360 árum fór ungur herkonungur frá Makedóníu á Grikklandi fyrir velþjálfuðum her sínum inn í Íran, sigraði og lagði undir sig allt landssvæði svokallaðra mið Austurlanda. Þá þegar komust Grikkir í snertingu við a.m.k. 3 þúsunda ára gamla menningu, sem hafði meitlast og þróast í gegn um árþúsundin.
Þessi rúmlega 5 þúsund ára menning er hluti menningar heimsins. Mikilvæg arfleifð sem öllu mannkyni ber að standa vörð um og væri betra að betri hluti þeirrar menningar skolaði upp á yfirborðið í stað þeirrar helfararmenningar sem nú stjórnar Íran.
