„Þarna voru hundruð eða þúsundir dýra hlaupandi laus inni í húsinu.“ Þetta segir Ásgeir Þór Ásgeirsson aðstoðarlögreglustjóri um aðkomuna í Dalsbúi í Mosfellsdal í morgun. Búr dýranna og húsin höfðu verið opnuð.
Ásgeir segir þúsundir minka enn lausa inni á búinu og fyrir skemmstu voru hundruð minka í öryggisgirðingunni í kringum búið. „Síðan er búið að veiða og aflífa hundruð dýra líka í nágrenni búsins,“ segir hann.
Þegar búið er að tæma öryggisgirðinguna verður hægt að nota hunda til að finna minka utan hennar.
10-12 þúsund minkar
Lögreglu barst tilkynning rúmlega sjö í morgun um að fjölda minka hefði verið sleppt út. Á bilinu 10-12 þúsund dýr voru á búinu en Ásgeir veit ekki töluna á þeim sem hafa verið fönguð og drepin.
Lögregla hefur heimild til að rannsaka húsbrot og möguleg eignaspjöll á Dalsbúi. Rannsókn lögreglu er á frumstigi. Þá þykir Ásgeiri sennilegt að MAST kæri brot á lögum um dýravelferð.
Krúttlegir en varasamir
Fjölmargir koma að aðgerðum í Mosfellsdal. Ásgeir giskar á að það séu á bilinu 40 og 50 manns. Hann bendir á að ef fólk verður vart við minka sé hægt að tilkynna það til þjónustuvers Mosfellsbæjar og að vara þurfi sig á þeim.
„Þó að þeir séu krúttlegir að sjá þá eru þetta rándýr,“ segir hann. „Minkar bíta fast og það eru virkilegar afleiðingar af því.“
Ásgeir segir lífríkinu í dalnum hafa verið raskað.
Þá geti minkarnir haft slæm áhrif á annað – til dæmis börn í sumarbúðum nálægt og börn á hestanámskeiðum.
„Hestar geta fælst undan börnum. Þetta geta verið afleiðingar. Við erum að gera allt sem við getum til að tryggja það að þetta smitist ekki langt frá bænum. Það er verkefnið og verður í dag og næstu daga,“ segir Ásgeir.
