Fjörug umræða myndaðist á Facebook síðu Stefáns Einars Stefánssonar þar sem Stefán ræddi svör Karim Askari, formanns Stofnunar múslima á Íslandi við fyrirspurn um predikarann umdeilda, Muhammad Taqi Usmani.
Gísli Freyr Valdórsson kvaðst ætla að bíða eftir því að Sigmundur Ernir Rúnarsson legði línuna um mál trúarleiðtogans líkt og þingmaðurinn hefði gert vegna ummæla kaþólsks prests í mars. Sigmundur svaraði að einu gilti hvaðan hinsegin hatur kæmi. Þegar gagnrýni hans á múslimska leiðtoga bar á góma vísaði hann í fyrri skrif sín, án þess þó að nefna tiltekinn pistil.
Stefán Einar, sem stýrir umræðuþættinum Spursmálum á mbl.is, deildi þar frétt miðilsins um Stórmoskuna og heimsókn Usmanis.
Með fréttinni skrifaði hann:
„Íslendingum er boðið upp á þetta í eigin landi!
Hvenær þrýtur gestrisnina örendið?“
Spurningum um afstöðu trúfélagsins ósvarað
Í frétt mbl.is, sem birtist að kvöldi 28. október, kom fram að Karim Askari, formaður Stofnunar múslima á Íslandi, segði forsvarsmenn Stórmoskunnar ekkert hafa að fela. Hann hefði þó ekki svarað skriflegum spurningum miðilsins, meðal annars um afstöðu trúfélagsins til dauðarefsinga fyrir trúarfráhvarf og réttinda samkynhneigðra.
Usmani hefur varið dauðarefsingu fyrir trúarfráhvarf, aflimanir og grýtingu samkvæmt íslömskum rétti og gagnrýnt afglæpavæðingu kynferðissamskipta samkynhneigðra.
Askari hefur sagt að skoðanir Usmanis séu ekki sjálfkrafa afstaða Stofnunar múslima á Íslandi eða Stórmoskunnar og að moskan hafi ekki boðið honum formlega. Þorbjörg Sigríður Gunnlaugsdóttir dómsmálaráðherra sagði við mbl.is að boðskapur hans gengi gegn grunngildum íslensks samfélags.
Bíður eftir að Sigmundur leggi línuna
Nútíminn greindi fyrstur miðla frá fyrirlestrinum 25. október. Þá hafði verið skorað á Samfylkinguna og Sigmund Erni á X að fordæma hann með vísan til fyrri ræðu þingmannsins um kaþólsku kirkjuna.
Gísli Freyr, umsjónarmaður hlaðvarpsins Þjóðmála, tók einnig þessa línu í athugasemdunum.
„Ég ætla bara að bíða með að taka afstöðu í málinu þar til Sigmundur Ernir leggur línuna, líkt og hann gerði með kaþólska prestinn sem fékk yfirhalningu úr pontu Alþingis.“
Stefán Einar svaraði honum:
„Gísli Freyr Valdórsson já hvar er Kötturinn með höttinn nú?“
Sigmundur Ernir svaraði þó Gísla Frey:
„Gísli Freyr gildir einu hvaðan hinsegin hatur kemur“
Hákon Jónsson gerði athugasemd við það svar:
„Sigmundur Ernir Rúnarsson þú virðist samt bara gagnrýna það þegar það kemur úr annarri áttinni. Það má gagnrýna það.“
Sigmundur skrifaði þá eftirfarandi í athugasemd sem er merkt breytt:
„Ég hef gagnrýnt múslimska leiðtoga fyrir alls konar óþverra, kvenhelsi og kynfæraskemmdir og hvaðeina. Þú verður bara að lesa mig oftar“
Í annarri athugasemd segir hann svo öðrum notanda að lesa greinasafnið sitt.
Krafðist dæma úr skrifum Sigmundar
Ólafur Haukur Árnason gagnrýndi framgöngu Sigmundar gagnvart kaþólikkum og sakaði hann um að ala á tortryggni gagnvart þeim til að skora pólitísk stig. Hann kallaði síðan eftir því að þingmaðurinn vísaði á skrif sín um slík mál:
„En þú getur kannski bent fólki á hvar sé að finna sambærilegan áróður gegn Islam í þessum skrifum þínum sem þú vísar í? Það gengur ekki beint vel að finna það og það er sanngjörn lágmarkskrafa gagnvart þeim samborgurum þínum sem þú hefur alið á tortryggni gegn í krafti stöðu þinnar í samfélaginu.“
Fordæmdi orð kaþólska prestsins í mars
Tilvísun Gísla Freys til kaþólska prestsins sneri að séra Jakobi Rolland. Sigmundur fordæmdi ummæli hans um kynhneigð undir liðnum störf þingsins á Alþingi 4. mars. Þar sagði hann meðal annars: „Kaþólska kirkjan býðst nú til að deyfa kynhneigð Íslendinga af því að þeir skulu skammast sín fyrir hana.“
Í sömu ræðu sagði Sigmundur: „Kaþólska kirkjan á Íslandi er að semja sig úr lögum við Ísland með þessum ömurlegu ummælum sem er það argasta afturhald sem við höfum heyrt á þessu ári.“ Hann bætti við: „Nei, við ætlum ekki að líða þetta.“
Þremur dögum síðar fylgdi hann málinu eftir í pistlinum „Miðaldir eru að baki á Íslandi“ á Eyjunni. Þar skrifaði hann: „Sem fulltrúi löggjafans mun ég fylgja þessu máli eftir á Alþingi. Pápísk orðræða af því tagi sem hér um ræðir verður ekki liðin á Íslandi.“
