„Við höfum á undanförnum vikum fengið meira en sjö hundruð fyrirspurnir vegna hvalveiða við Ísland,“ segir Jarle Hetland, yfirmaður samskipta hjá ESA, eftirlitstofnun EFTA í samtali við RÚV. „Þessar orðsendingar koma hvaðanæva að úr heiminum og við lítum sjálfstætt á hverja og eina þeirra, jafnvel þótt margar séu keimlíkar.“
ESA sá í dag ástæðu til að senda frá sér yfirlýsingu þar sem segir að fyrirspurnirnar séu varðandi hvalveiðar á Íslandi og meðferð tilkynntra atvika sem tengist velferð dýra á núverandi tímabili hvalveiða.
„Hlutverk ESA er að fylgjast með því að EES-samningurinn og löggjöf sem felld er inn í samninginn séu virt,“ segir í tilkynningunni frá ESA. „Eins og fram kemur í ákvörðun stofnunarinnar frá 2024 er engin EES-löggjöf um velferð dýra sem gildir um aflífun villtra sjávarspendýra, svo sem hvala. Þar sem engar viðeigandi EES-reglur eru fyrir hendi getur ESA ekki brugðist við þeim álitaefnum sem koma fram í nýlegum fyrirspurnum.“
Í ákvörðun ESA frá því í apríl 2024 kemur fram að kvörtunin sem þá var tekin fyrir (og hafnað) snerist ekki aðeins um ákvæði EES samningsins sem varða velferð dýra, heldur einnig um ólöglega meðferð á matvælum, að hvalveiðar samræmdust ekki markmiðum íslenskra stjórnvalda í umhverfismálum, að vinnsla hvals á landi spillti vatnsgæðum og að meðferð sorps frá hvalskipum væri ekki í samræmi við gildandi reglur. Öllum þessum umkvörtunum var vísað frá í ákvörðun ESA frá því í apríl 2024.
