Poppstjarnan Ariana Grande hefur höfðað mál gegn tveimur tölvuþrjótum sem hún segir hafa lekið óútgefinni tónlist og myndskeiðum í hennar eigu. Í síðasta mánuði krafðist Grande þess að Hvíta húsið hætti að nota tónlist hennar til að kynna stefnu Bandaríkjaforseta í innflytjendamálum.
Grande, sem er ein vinsælasta söngkona heims, segir tölvuþrjóta hafa komist inn í tölvur samstarfsfólks hennar og þannig haft af henni efni.
Efnið hafi síðan verið selt á myrkravefnum fyrir háar fjárhæðir. Samkvæmt lögmönnum söngkonunnar hefur hundruðum laga í hennar eigu verið lekið frá því hún hóf tónlistarferil sinn fyrir um fimmtán árum síðan.
Kallar tölvuþrjótana sjóræningja og glæpamenn
Enn er á huldu hverjir tölvuþrjótarnir eru en lögmenn Grande segja málsókninni ætlað að leiða það í ljós.
Meðal efnis sem hefur verið lekið er lagið Fantasize sem Grande samdi árið 2024 ásamt sænska tónlistarframleiðandanum Max Martin. Hún hefur sagt tölvuþrjótana vera sjóræningja og glæpamenn og sakar þá um að hafa skaðað samband hennar við aðdáendur sína.
Lögmenn söngkonunnar segja brotin hafa valdið henni óbætanlegu tjóni, bæði á einkalífi hennar og starfsferli. Háttsemi þrjótanna er lýst sem kerfisbundnum verknaði sem staðið hafi yfir árum saman og beinst að reikningum samstarfsfólks Grande.
Stjórnvöld notuðu lagið Bye til að kynna innflytjendastefnu sína
Í síðasta mánuði krafðist Grande þess að Hvíta húsið notaði ekki tónlist hennar til að kynna stefnu Donalds Trump Bandaríkjaforseta í innflytjendamálum. Hvíta húsið hafði þá birt myndskeið á samfélagsmiðlinum TikTok þar sem sást til landamæravarða handtaka fólk og flytja í varðhald. Lag Grande, Bye, hljómaði undir myndskeiðinu.
Grande gagnrýndi notkun tónlistar sinnar harðlega og sagði stefnu stjórnvalda villimannslega, ómannúðlega og viðurstyggilega.
Hún bættist þar með í hóp þekktra listamanna á borð við ABBA, Celine Dion og Beyonce sem hafa mótmælt því að Trump noti tónlist þeirra.
