Kristján Loftsson, eigandi Hvals ehf., gagnrýnir það pláss sem endurteknar komur samtaka hvalveiðiandstæðingsins Paul Watsons til landsins fá í umfjöllun fjölmiðla.
„Það er magnað hve íslenskir fjölmiðlar nenna að eltast við þennan eftirlýsta terrorista,“ segir Kristján í samtali við mbl.is. „Þegar Paul Watson gefur út yfirlýsingu þá er eins og himin og jörð séu að farast á Íslandi.“
Fyrr í dag sendu samtök Paul Watsons, Captain Paul Watson Foundation, frá sér tilkynningu þess efnis að skip samtakanna, Bandero, verði siglt til landsins í sumar. Tala samtökin um „Operation 86“, eða Aðgerð 86, og vísa með því til þess þegar Watson og hans fylgismenn sökktu bátunum Hval 6 og Hval 7 í Reykjavíkurhöfn árið 1986.
Í yfirlýsingu samtakanna felst ákveðin hótun en aðgerðunum 1986 er ítrekað lýst, í myndum og máli og er haft eftir Watson að til standi að ljúka þeirri vegferð sem hafin var árið 1986.
Koma reglulega vegna hvalveiða
Samtök Watsons hafa raunar komið nokkrum sinnum til landsins síðan þá, en fyrir síðasta sumar var það tilkynnt að samtökin hygðust trufla hvalveiðar með öllum tiltækum ráðum. Árið þar áður var það sama uppi á teningnum og var haft eftir Watson að tíminn væri runninn út fyrir Kristján Loftsson.
Samtökin stefndu einnig að því að koma til landsins árið 2023 en á meðan skipið var á leiðinni var tímabundnu og umdeildu hvalveiðibanni komið á undir stjórn Svandísar Svavarsdóttur sem þá var matvælaráðherra.
Sem fyrr segir tjáir Kristján sig lítið um yfirlýsingar samtakanna. „Eðlilegra væri hjá íslenskum fjölmiðlum að spyrja Landhelgisgæsluna og lögregluna hvernig þessir aðilar ætli að bregðast við, komi hann inn í íslenska lögsögu.“
Landhelgisgæslan hefur raunar áður fylgst með ferðum Watsons, en þegar skipið John Paul DeJoria sigldi til landsins árið 2023, var ferð þess vöktuð en engar sérstakar aðgerðir voru þá áætlaðar.
