Flugfélagið Icelandair tapaði fjórum milljörðum króna eftir skatta á öðrum ársfjórðungi þrátt fyrir tekjur hafi aukist um 7% milli ára.
Tekjur flugfélagsins á ársfjórðungnum námu 61, 4 milljörðum króna, sem er aukning upp á 7%. Rekstrarhagnaður, EBIT, var neikvæður um 3,7 milljarða króna. Til samanburðar var rekstrarhagnaður á sama tímabili í fyrra 102,9 milljónir króna.
Í tilkynningu frá félaginu segir að tapið sé einkum vegna hækkandi eldsneytiskostnaðar. Verð á eldsneyti hefur farið hækkandi á árinu vegna átaka í Mið-Austurlöndum. Einingakostnaður, heildarkostnaður með tilliti til magns af vöru eða þjónustu, hækkaði um 15% með tilliti til eldsneytiskostnaðar. Einingakostnaður án eldsneytis hækkaði um 7% á milli ára.
Lausafjárstaða Icelandair er 76,3 milljarðar í lok ársfjórðungsins sem er aukning um 6,8 milljarða í samanburði við annan ársfjórðung á síðasta ári.
Góður árangur á mörgum sviðum
„Rekstrarumhverfið var krefjandi á öðrum ársfjórðungi vegna mikillar hækkunar eldsneytisverðs. Við náðum samt sem áður góðum árangri á mörgum sviðum og var afkoman í takt við afkomuspá okkar fyrir fjórðunginn. Við skiluðum met tekjum og ef hækkun eldsneytiskostnaðar er tekin út fyrir sviga náðum við undirliggjandi EBIT rekstrarbata á milli ára,“ er haft eftir Boga Nils Bogasyni, forstjóra Icelandair, í tilkynningunni.
„Tekjur á hvern seldan sætiskílómetra hækkuðu og var sætanýting, ásamt stundvísi, áfram góð. Til að bregðast við krefjandi aðstæðum höfum við aðlagað framboð, hækkað fargjöld, lagt mikla áherslu á kostnaðaraðhald og ákveðið að hætta rekstri Boeing 757 flugvéla fyrr en áætlað var.“
Í tilkynningu Icelandair segir að undirliggjandi rekstrarbati án áhrifa eldsneytiskostnaðar hafi aukist um 9 milljarða króna eða 5,1 milljarð að teknu tilliti til áhrifa eldsneytisvarna.
Tap eftir skatta nam 4 milljörðum króna á síðasta ársfjórðungi. Á sama tíma á síðasta ári var félagið í 1,7 milljarða króna hagnaði en þá höfðu jákvæð gengisáhrif í fjármagnsliðum áhrif.
„Tekjuhorfur á þriðja ársfjórðungi eru góðar og gerum við ráð fyrir að einingatekjur verði þær hæstu í sögu félagsins. Eftirspurn er mikil til og frá Íslandi, og nær hápunkti til Íslands í kringum sólmyrkvann í ágúst. Þá gerum við ráð fyrir að EBIT í þriðja ársfjórðungi muni batna milli ára,“ er haft eftir Boga Nils.
