„Það er í sjálfu sér ekkert nýtt sem kemur fram við lesturinn,“ segir Hanna Katrín Friðriksson atvinnuvegaráðherra um nýlega umfjöllun Berlingske um íslenskan sjávarútveg.
„En greinin dregur óneitanlega upp býsna einhliða mynd. Við vitum alveg að þrátt fyrir ákveðna galla og atriði sem sannarlega mættu betur fara hefur sjávarútvegurinn á síðustu áratugum skilað gíðarlega miklu til samfélagsins.“
Í grein danska blaðsins segja viðmælendur að íslenskur sjávarútvegur byggist á ótta og græðgi. Þar er sögð við lýði „nútíma fámennisstjórn“ þar sem yfirstétt innan sjávarútvegsins hafi óhófleg áhrif á pólitískar ákvarðanir og reynt sé að þagga niður í gagnrýnisröddum.
„Það er ekkert leyndarmál að það eru gríðarlega sterk tengsl á milli ákveðinna fyrirtækja og einstaka stjórnmálamanna eða flokka,“ segir atvinnuvegaráðherra. Hún segir það hafa komið sérstaklega í ljós þegar breyta átti lögum um veiðigjöld síðasta sumar.
„Þessu þarf að breyta og það er verið að vinna í því.“
Hanna Katrín segir sömu öflin að verki núna þegar greiða á atkvæði um framhald aðildarviðræðna við Evrópusambandið. „Þetta er auðvitað ekki hollt.“
Ábyrgðin sé stjórnmálanna
Í umfjölluninni er haft er eftir Daða Má Kristóferssyni fjármálaráðherra að öflugir þrýstihópar hafi staðið í veg fyrir úrbótum.
„Ég tek alveg undir það,“ segir Hanna Katrín. Hún bætir þó við að það sé stjórnmálanna að vinna gegn slíku.
„Það erum við sem berum ábyrgð á því að samfélagið og lýðræðið virki og það séu ekki einstaka öfl sem hafi óhóflega mikil ítök í því hvernig ákvarðanir eru teknar í lýðræðisríkinu Íslandi.“
Margt til fyrirmyndar í sjávarútvegi
Hanna Katrín segir málið ágætt fyrir rannsóknarblaðamann að kafa ofan í. „Það er ekkert launungarmál að það hafa verið átök í íslensku samfélagi, árum jafnvel áratugum saman.“
Átökin hafi aðallega staðið um afleiðingar þess hvernig fiskstjórnunarkerfinu er stýrt og hvernig ágóði þess skiptist. „En það er mikilvægt að halda því á lofti að kerfið okkar hefur skilað mörgu mjög góðu. Sjávarútvegurinn okkar er sem slíkur til fyrirmyndar. Þó svo að sannarlega megi færa ákveðna þætti til betri vegar og að því er unnið.“
