Hinn ellefu ára Rökkvi hefur enn ekki hafið skólagöngu í haust, þótt rúmar sex vikur séu liðnar frá því skólaárið hófst. Móðir hans, Sigurrós Yrja, segir að pláss bíði hans í skólaúrræði Klettabæjar, þar sem honum leið loks vel í sumar. Samþykki skóla- og frístundasviðs Reykjavíkurborgar hafi hins vegar ekki borist og hún hafi ekki fengið skýringar á töfinni.
Á meðan drengurinn bíður segir móðir hans líðan hans fara versnandi. Hann sé einmana, gráti reglulega og skilji ekki hvers vegna hann fái ekki að fara þangað sem honum líði vel. Skólaúrræði Klettabæjar hefur einnig haft samband við borgina vegna málsins, en ekki fengið svör.
„Ég fékk barnið mitt til baka“
Að sögn Sigurrósar er Rökkvi með ADHD og einhverfugreiningu og hefur átt erfitt uppdráttar í hefðbundnu skólaumhverfi. Hún segir að lengi hafi verið leitað að stuðningi sem mætti þörfum hans og að mikil breyting hafi orðið þegar hann hóf að sækja Klettabæ í lok júní.
Í sumar var hann þar í frístundarúrræði alla virka daga og í helgardvöl aðra hverja helgi.
Sigurrós segir að strax á fyrstu vikunni hafi orðið greinileg breyting á líðan hans. Hún hafi ekki séð honum líða jafn vel síðan hann var tveggja ára.
„Ég fékk barnið mitt til baka,“ segir hún.
Hún segir að engin formleg höfnun hafi heldur borist og að hún viti ekki hvað standi í vegi fyrir samþykkinu
Klettabær er einkarekinn þjónustuaðili sem sinnir meðal annars börnum og ungmennum með fjölþættar stuðningsþarfir. Starfsemin nær yfir skólaúrræði, frístundastarf, skammtímadvalir og búsetuúrræði, með áherslu á einstaklingsmiðaðan stuðning sem tekur mið af þörfum hvers og eins.
Plássið er til staðar
Samkvæmt frásögn Sigurrósar lá fyrir rétt áður en skólaárið hófst, 25. ágúst, að Klettabær hefði pláss fyrir Rökkva í skólaúrræðinu. Til þess að hann geti hafið nám þar þurfi hins vegar samþykki skóla- og frístundasviðs borgarinnar. Það hefur enn ekki borist.
Hún segir að engin formleg höfnun hafi heldur borist og að hún viti ekki hvað standi í vegi fyrir samþykkinu. Rökkva hafi ekki verið úthlutað plássi í öðrum skóla fyrir veturinn.
Sigurrós segir að barnaverndarþjónusta og félagsráðgjafi hjá Norðurmiðstöð hafi einnig fylgt málinu eftir og vilji að hann fái að hefja skólagöngu hjá Klettabæ.
Hún kveðst ekki geta sent hann aftur í hefðbundinn skóla, eftir þá reynslu sem hann hafi þegar haft af skólagöngu.
„Ég mun ekki gera honum það að setja hann aftur í hefðbundinn skóla, vitandi hvaða áhrif það mun hafa á líðan hans og hegðun.“
Lofað fundum en fær enga niðurstöðu
Sigurrós segist ítrekað hafa hringt í borgina til að fá upplýsingar. Hún hafi ekki fengið að ræða við þá sem taki ákvörðun um málið, heldur þurft að koma skilaboðum áleiðis í gegnum þann sem svari símanum.
„Eina sem hefur verið sagt við mig er að það eigi að funda fljótlega, aftur og aftur og aftur. En ég heyri aldrei af neinum fundi sem var haldinn og aldrei berast svör.“
Hún segir að sér hafi jafnframt verið lofað að haft yrði samband við hana, án þess að það hafi gengið eftir. Hún hafi loks ákveðið að leita til fjölmiðla til að vekja athygli á stöðunni og fá hreyfingu á málið. Hún lýsir þeirri tilfinningu að hjá borginni sé sonur hennar aðeins kennitala á blaði.
Einangrunin farin að hafa áhrif
Biðin hefur að sögn Sigurrósar þegar haft alvarleg áhrif á Rökkva. Hann sé einmana og einangraður, hafi lítið fyrir stafni og upplifi að hann skipti ekki máli. Hann hafi loksins fundið stað þar sem honum leið vel, en skilji ekki hvers vegna hann fái ekki að fara þangað í skóla.
Hún segir jafnframt að hann sé aftur farinn að tala um sjálfsvíg og óttast að sá bati sem varð í sumar sé að glatast. Hún segir hann leggja sig mikið fram og hafa skýrar hugmyndir um hvert hann vilji stefna í lífinu.
Umboðsmaður barna býðst til að leita svara
Sigurrós hefur einnig leitað til umboðsmanns barna. Í skriflegu svari sem Nútíminn hefur undir höndum kemur fram að embættið hafi ekki heimild til að endurskoða ákvarðanir sveitarfélaga um hvar einstakt barn skuli sækja skóla. Það geti hins vegar óskað eftir upplýsingum um töfina og lagt áherslu á að Rökkvi fái nauðsynlegan stuðning.
„Það er búið að finna það sem virkar fyrir hann. Lausnin er til, hún er í boði“
„Það sem embættið getur hins vegar gert er að óska eftir upplýsingum frá Reykjavíkurborg um ástæður þess að svör hafa ekki borist og leggja áherslu á mikilvægi þess að sonur þinn fái þann stuðning sem hann þarf til að geta sótt skóla án frekari tafa,“ segir í svarinu.
Í samskiptunum er jafnframt lögð áhersla á að lausn verði fundin í samráði við foreldra og fagfólk, með hagsmuni og þarfir barnsins að leiðarljósi.
Borginni ber að tryggja skólavist
Samkvæmt grunnskólalögum er börnum á aldrinum sex til sextán ára að jafnaði skylt að sækja grunnskóla. Í 5. grein laganna er sveitarfélögum jafnframt gert skylt að tryggja að skólaskyld börn sem þar eiga lögheimili njóti skólavistar. Þau bera einnig ábyrgð á sérúrræðum grunnskóla.
Í 13. grein er kveðið á um rétt nemenda til kennslu sem hæfir þeim og námsumhverfis sem tekur mið af þörfum þeirra og vellíðan. Þá tryggir 17. grein nemendum með tilteknar stuðningsþarfir rétt til sérstaks stuðnings í samræmi við metnar þarfir þeirra. Við ágreining um fyrirkomulag skólavistar skal taka mið af áliti sérfræðinga og heildarhagsmunum barnsins.
Sigurrós segir að þegar sé búið að finna úrræði sem virki fyrir hann.
„Það er búið að finna það sem virkar fyrir hann. Lausnin er til, hún er í boði.“
Nútíminn hefur sent skóla- og frístundasviði Reykjavíkurborgar fyrirspurn um málið og óskað skýringa á töfinni og svörum um hvenær Rökkvi geti hafið skólagöngu. Svör borgarinnar verða birt þegar þau berast. Borgin hefur staðfest móttöku skilaboðanna.
