Ekkert núverandi aðildarríki Evrópusambandsins (ESB) hefur, svo vitað sé, varanlega undanþágu frá reglusafni sambandsins á sviði sjávarútvegs.
Þetta kemur fram í svörum Mariu Reumert Gjerding, umhverfisráðherra Dana, við fyrirspurnum Evrópunefndar danska þingsins frá 12. júní um hugsanlegar aðildarviðræður Íslands.
Spurt var hvort fordæmi væru fyrir því að aðildarríki gæti varanlega staðið utan valdheimilda ESB í sjávarútvegi og haldið fullu forræði yfir auðlindum hafsins. Gjerding sagði að þrátt fyrir fordæmi um varanlegar undanþágur frá sáttmálum ESB hefði ekkert núverandi aðildarríki undanþágur á fiskveiðisviðinu, „svo vitað sé“.
Í svörum ráðherrans kemur fram að ESB eitt hafi forræði yfir auðlindum hafsins innan sameiginlegu fiskveiðistefnunnar og Evrópuréttur gangi þar framar landsrétti. Gengi Ísland í ESB gæti Evrópudómstóllinn eða framkvæmdastjórnin hnekkt íslenskum takmörkunum í sjávarútvegi, þættu þær ganga á svig við Evrópurétt.
Umfangið kynni þó að velta á mögulegum aðildarviðræðum.
Kviknað hefur umræða um hvort Íslandi bjóðist varanlegar undanþágur frá fiskveiðistefnu ESB í aðildarviðræðum, eins og greint var frá í frétt Morgunblaðsins í gær um fyrirspurnir til ráðherra í hollenska þinginu.
Í gær sagði írski Evrópuþingmaðurinn Ciarán Mullooly það í Evrópuþinginu að þrátt fyrir vinsemd í garð Íslendinga og virðingu fyrir sjálfbæru fiskveiðikerfi þeirra myndu írskir sjómenn aldrei þola að Ísland fengi undanþágur eða ívilnanir umfram þá.
