Tólf manns létust þegar eldur kom upp í brúðkaupsveislu í Kinshasa, höfuðborg Lýðstjórnarlýðveldisins Kongó, að því er stjórnvöld greindu frá í dag.

Eldurinn kom upp aðfaranótt laugardags og stendur vinna enn yfir við að bera kennsl á þá sem létust, samkvæmt upplýsingum frá stjórnvöldum þarlendis.

Myndskeið sem birt hafa verið á samfélagsmiðlum sýna mikinn fjölda fólks troðast niður þröngan stiga í byggingunni í örvæntingarfullri tilraun til að komast undan eldinum og út úr húsinu.

Stjórnvöld hafa í kjölfar harmleiksins boðað kerfisbundnar öryggisskoðanir á húsnæði sem notað er fyrir opinbera viðburði. Stöðum sem ekki uppfylla öryggiskröfur verður lokað þegar í stað.

Ekki hefur verið upplýst um eldsupptök. Bilaðar eða ófullnægjandi raflagnir eru þó algeng orsök eldsvoða í Kinshasa.