Einn grunaður vegna eldsins í Drammen

Ein manneskja er með stöðu grunaðs vegna eldsins í Drammen sem kviknaði á föstudag. Það þýðir þó ekki að eitthvað saknæmt hafi átt sér stað, að sögn Ninu Fladhus, saksóknara hjá lögreglunni í Suðaustur-Noregi.

Í frétt Norska ríkisútvarpsins, NRK, segir að lögregla vinni að því að safna upplýsingum. Manneskjan hafi fengið stöðu grunaðs til að verja rannsóknarhagsmuni.

„Við leggjum áherslu á að þótt manneskja sé með stöðu grunaðs þýði það ekki að lögreglan hafi upplýsingar um hvað varð til þess að eldurinn kviknaði eða að eitthvað saknæmt hafi átt sér stað,“ segir Fladhus.

Lögregla hafi grun um hvar eldurinn hafi kviknað en ekki neinn grunn til að segja til um upptök hans. Það eigi eftir að taka einhvern tíma að komast að því. Enn eigi eftir að rannsaka vettvang betur.

Lögregla nýtur aðstoðar Rannsóknarlögreglu Noregs, Kripos, við rannsókn málsins.

Slökkviliðið segist hafa náð stjórn á eldunum en að mikil vinna sé enn eftir á vettvangi. Áfram verði fylgst með svæðinu og þyrla í viðbragðsstöðu.

Slökkviliðið setti í dag fram nákvæma tímalínu á fyrstu mínútum eftir að eldurinn kviknaði. Fyrsta símtal til Neyðarlínunnar barst klukkan 15:35. Tveimur mínútum síðar lögðu slökkvilið í Mjøndalen og Drammen af stað. Klukkan 15:44 komu fyrstu slökkviliðsmenn á staðinn og mínútu síðar hófust slökkvistörf.

Í samskiptum slökkviliðsmanna við stjórnstöð kom fram að eldur væri í fimm hæða íbúahúsi og að hann breiddist hratt út.

Jonas Gahr Støre, forsætisráðherra Noregs, er í heimsókn í Drammn. Hann ræddi við Kjell Arne Hermansen borgarstjóra áður en hann hitti fólk sem missti heimili sín í eldunum. Síðar í dag skoðar hann vettvang eldsvoðans.

Hermansen staðfesti við NRK í dag að 116 heimili væru gjörónýt eftir eldana og að sveitarfélagið hefði fengið íbúðir til að hýsa þá sem misstu heimili sín.

Enginn lést í eldsvoðanum og enginn slasaðist alvarlega. Einn hermaður og einn almennur borgari voru fluttir á sjúkrahús með reykeitrun. Einn slökkviliðsmaður og átta lögreglumenn fengu aðhlynningu sjúkraflutningamanna eftir að hafa andað að sér reyk.