Eigendur Sóltúns handteknir
Í fyrra samþykkti embætti Skattsins beiðni eigenda Öldungs hf., móðurfélags hjúkrunarheimilisins Sóltúns í Reykjavík, um lækkun hlutafjár félagsins með útgreiðslu til hluthafa upp á rúman milljarð króna en þetta kemur fram í umfjöllun RÚV um málið.
Slík ráðstöfun er heimil samkvæmt lögum ef fjárhags- og skuldastaða félags telst nægilega sterk og þarf samþykki Skattsins fyrir framkvæmdinni.
Helstu eigendur Öldungs eru Arnar Þórisson og Þórir Kjartansson, en samtals eiga þeirra 90% í fyrirtækinu, auk Önnu Birnu Jensdóttur, fyrrverandi forstjóra Sóltúns.
Málefni Sóltúns hafa undanfarið verið til rannsóknar hjá lögreglu eftir kæru frá Jóhanni Óla Guðmundssyni, fyrrverandi eiganda hjúkrunarheimilisins. Hann kærði Arnar og Þóri í ársbyrjun vegna meintra vanefnda á kaupsamningi sem hann segir að hafi verið gerður fyrir 17 árum. Arnar og Þórir voru báðir handteknir, samkvæmt heimildum RÚV, í mars af lögreglu og framkvæmdar voru húsleitir hjá þeim.
Í kærunni heldur Jóhann Óli því fram að hann hafi aldrei fengið greitt meint tveggja milljarða króna kaupverð fyrir Sóltún.
Lögmaður Þóris Kjartanssonar hefur hafnað ásökununum og sagt kæruna tilhæfulausa.
