Ungir menn, sem sagðir eru hafa ógnað fólki með leikfangabyssum á Akureyri, verða mögulega ákærðir fyrir vopnalagabrot. Meira en hálfur sólarhringur leið frá því að mennirnir voru handteknir þar til greint var frá því að þeir hefðu ekki verið með alvöru byssur.
Í skotvopnalögum er fjallað um eftirlíkingar af byssum og þeim settar talsvert þröngar skorður; það þarf til dæmis byssuleyfi, þær þarf að skrá og geyma í byssuskáp.
Sérsveitin aðstoðaði við handtökuna
Upp úr klukkan þrjú síðdegis á sunnudag greindi lögreglan á Norðurlandi eystra fréttastofu frá því að fimm ungir menn hefðu verið handteknir í stórri lögregluaðgerð á Akureyri. Mennirnir eru í kringum tvítugt, búa á Íslandi en eru af erlendum uppruna.
Samkvæmt lögreglu höfðu þeir beint skotvopnum að fólki og í ljósi alvarleika aðstoðaði sérsveit ríkislögreglustjóra við handtöku mannanna. Fljótlega á eftir var staðfest að byssur hefðu fundist í bílum mannanna og þeir voru færðir til yfirheyrslu.
Byssurnar reyndust hins vegar vera leikföng, sem lögregla kallaði mjög nákvæma eftirlíkingu. Samkvæmt lögreglu staðfesti bæði útlit þeirra og þyngd það.
Byssurnar voru svipaðar alvöru byssum að stærð og mjög eðlilegt að fólk hafi orðið hrætt að sjá fullorðið fólk með þær í höndunum, segir lögregla.
Miðlun upplýsinga hefði geta verið betri
Mörg þúsund manns voru á fjölskylduskemmtun á Akureyri um helgina. Lögregla staðfesti þó ekki fyrr en um klukkan níu á mánudagsmorgun að menn hefðu ekki verið á ferð um bæinn með hlaðnar byssur.
Á meðan loguðu kommentakerfi samfélagsmiðlanna, þar sem margir kölluðu eftir þungum refsingum eða að mönnunum yrði vísað úr landi.
Lögreglan á Norðurlandi eystra sagði enga sérstaka ástæðu að baki tímanum sem leið frá handtöku og þangað til almenningi var greint frá því að mennirnir hefðu verið vopnaðir dótabyssum. Þetta hefði bara atvikast svona í annríki helgarinnar og mögulega hefðu þau geta gert betur í miðlun upplýsinga.
Eftir situr að mennirnir létu eins og þeir væru vopnaðir og beindu samkvæmt lögreglu leikfangabyssunum út um glugga á bíl í átt að fólki. Lögregla segir þá þó hafa verið samvinnuþýða eftir handtöku. Þeim var sleppt að lokinni skýrslutöku og ekki er talin stafa ógn af þeim.
