Ming Ting Mancel var í dag ákærð fyrir manndráp á þrítugri dóttur sinni í samverknaði við eiginmann sinn. Hún er ekki ákærð fyrir aðkomu að andláti eiginmanns síns, Emerics Mancel. Eiginmaður hennar og dóttir létust á Edition-hótelinu 14. júní 2025.
Ming Ting Mancel var handtekin á Edition-hótelinu í júní 2025 eftir að starfsmaður hótelsins kom að óhugnanlegum aðstæðum á herbergi fjölskyldunnar.
Málið er án fordæma og rannsókn lögreglu hefur teygt sig til fjölda landa. Mörgum spurningum hefur verið ósvarað um fjölskylduna til þessa, meðal annars hvaða fólk þetta var sem endaði lífið með þessum hætti, á einu dýrasta hóteli Reykjavíkur, sama dag og þau áttu pantað far aftur heim til Írlands.
Ítarlega er fjallað um málið í þættinum Sögum úr raunveruleikanum á Rás 1. Þar er meðal annars rætt lögmann ættingja fjölskyldunnar.
Erfitt að finna upplýsingar um fjölskylduna
Fjölskyldufaðirinn hét Emeric Mancel og var 57 ára þegar hann lést. Hann var af frönskum ættum en bjó lengst af í Nýju-Kaledóníu. Það er eyjaklasi í Suður-Kyrrahafi, ekki langt frá ströndum Ástralíu, en tilheyrir Frakklandi. Þar kynntist Emeric eiginkonu sinni, Ming Ting Mancel, sem er af kínverskum ættum. Hjónin eignuðust saman dótturina Catherine Mancel en hún hefði orðið þrítug árið sem hún lést.
Það er ekki auðvelt að komast að upplýsingum um fjölskylduna og ástæður þess að Emeric og Catherine létust með þessum hætti á hótelherbergi í ókunnu landi. Nánast engin stafræn fótspor er að finna eftir þau.
Í skýrslutöku sagði konan að fjölskyldan hefði ætlað að fremja sjálfsvíg saman. Hún sagði eiginmann sinn hafa ætlað að stinga sjálfan sig í hjartað en loks beðið hana um að gera það og hún hafi orðið við þeirri ósk. Í næstu skýrslutöku nokkrum dögum síðar breytti konan framburði sínum, þá neitaði hún því að hafa stungið þau og sagði eiginmanninn fyrst hafa stungið dótturina, svo hana sjálfa. Það hafi verið hann sem kom með hnífa til landsins og ákveðið stað og stund verknaðarins.
Faðirinn með svart belti í bardagalist
Á vefmiðli í Nýju-Kaledóníu má finna grein frá árinu 2014 þar sem sagt var frá því að Emeric Mancel hefði hlotið svart belti í japanskri skylmingaíþrótt sem kallast kendó. Í kendó er barist með sverðum, í anda japanskra samúræja, og reynt að skora stig með nákvæmum höggum á ákveðna hluta líkamans.
Emeric hlaut svarta beltið á móti sem fram fór í Ástralíu. Við sama tilefni hlaut Catherine, dóttir hans, sérstök hvatningarverðlaun fyrir iðkun sína. Vefmiðillinn birtir ljósmynd af feðginunum og öðrum keppendum á mótinu í svörtum kuflum með sverð. Það er eina ljósmyndin sem fundist hefur á netinu af fjölskylduföðurnum.
Þótt lítið sé vitað um lifnaðarhætti fjölskyldunnar kom fljótlega í ljós við lögreglurannsókn málsins að heilsu Emeric hafði farið verulega hrakandi.
Maðurinn átti í deilum um arf við systur sína
Nýlega birtist umfjöllun um Edition-málið á vefmiðli í Nýju-Kaledóníu. Þar kom fram að systir Emerics Mancel, Francoise Diuex, hefði sínar efasemdir um að jafnræði hefði ríkt á milli þeirra hjóna, Emerics og Ming.
Systirin lýsti Emeric sem afar stjórnsömum manni. Hún hefði sjálf haft samband við lögregluna á Íslandi til að koma því á framfæri. Lögmaður hennar, Philippe Olivier, veitti viðtal fyrir hennar hönd um samskipti systkinanna á undanförnum árum.
Erjur komu upp á milli systkinanna eftir fráfall foreldra þeirra. Þau hafa á undanförnum árum átt í hörðum deilum um fjölskylduarfinn. Deilurnar urðu að dómsmáli, fyrst í Nýju Kaledóníu og svo fyrir áfrýjunardómstóli á Nýja Sjálandi.
Fjórum dögum eftir andlát Emrics heimilaði dómstóll í Nýja Sjálandi að frysta eignir og fjármuni Emeric Mancel. Dómurinn taldi systur hans hafa fært sannfærandi rök fyrir sínu máli og lagt fram gögn sem bentu til þess að Emeric hefði í áraraðir fært peninga móður þeirra inn á sína reikninga. Þannig hefði hann gengið á arf hennar.
Voru eins konar draugar að sögn lögreglu
Fjölskyldan leigði dýra lúxusíbúð í Dyflinni í tæpan áratug. Í byggingunni búa aðallega útlendingar sem vinna í borginni, og þar eru að auki skrifstofur, kaffihús og snyrtistofur. Hlaðvarpsritstjórn írska ríkismiðilsins RTE reyndi að afla upplýsinga um Mancel-fjölskylduna með því að ræða við fólk í nágrenninu. Nágrannarnir könnuðust lítið eða ekkert við fjölskylduna.
Á netinu hafi dóttirin Catherine verið skráð sem starfsmaður Airbnb, en skrifstofur þeirra voru skammt frá heimili fjölskyldunnar. Upplýsingar um starfsferil Catherine Mancel er að finna á síðu hennar á samfélagsmiðlinum LinkedIn. Þar er nokkuð ítarleg ferilskrá hennar og samkvæmt henni hafði Catherine starfað hjá Airbnb í nokkra mánuði.
Óljóst hvort dóttirin hafi ætlað sér að deyja
Sennilega var Catherine þó í atvinnuleit því á síðunni skrifar hún að hún sé að leita að sölustarfi hjá tæknifyrirtæki. Hún virðist hafa gegnt ýmsum störfum í upplýsingatæknigeiranum og hafa lokið diplómunámi í hótelrekstri frá bandarískum skóla árið 2016.
Af þessum skráða starfsferli hennar virðist hún hafa verið fær um að sjá um sig sjálf og vinna fyrir sér. Af linkedIn-síðu hennar má ráða að hún hafi ætlað sér aðra hluti en að láta lífið á hóteli í Reykjavík í júní 2025. Vikurnar áður en hún kom til Íslands lauk Catherine fjölmörgum netnámskeiðum til að efla færni sína, meðal annars í tímastjórnun, verkefnastjórnun og öðrum starfstengdum þáttum.
Það vekur því upp spurningar um hvers vegna tæplega þrítug kona með fjölmörg spil á hendi ætti að hafa viljað binda enda á líf sitt.
En það sem vekur mesta athygli á LinkedIn-síðu Cathrine Mancel er ljósmynd sem hún hefur gert að burðarmynd á þessum atvinnutengda samfélagsmiðli. Á myndinni er grænn prjónaður bangsi, sambærilegur bangsi og var við hlið hennar þegar hún fannst stungin til bana á Edition-hótelinu í Reykjavík.
Heimildir fréttastofu herma að lögregla hafi grun um að Catherine hafi mögulega glímt við einhvers konar skerðingu eða mótast af mikilli einangrun.
Segir þau öll hafa viljað deyja vegna erfiðra veikinda föðurins
Ming Mancel greindi lögreglu frá því að ástæður þess að fjölskyldan hefði viljað deyja hefðu meðal annars verið erfið veikindi eiginmanns hennar og deilur um erfðamál, sem hefðu reynt mjög á þau öll. Hún sagði þau hjónin hafa gefið dóttur þeirra fullt frelsi til að ákveða sín eigin örlög og hún hafi verið ákveðin í að deyja með foreldrum sínum. Loks hafi eiginmaður hennar ákveðið að stundin væri runnin upp.
Fjölskyldan snæddi sína síðustu kvöldmáltíð á sushi-stað í Tryggvagötu. Þaðan fór hún fótgangandi að Edition-hótelinu þar sem þau Emeric og Catherine létust um nóttina.
Systir Emerics er furðu lostin yfir atburðarásinni. Lögmaður hennar segir flókið að fylgjast með framvindu málsins á Íslandi og þau umbjóðandi hans fái hvergi skýr svör. Málið hafi vakið miklar og sárar tilfinningar og það sé íþyngjandi fyrir umbjóðanda hans að vita af mágkonu sinni frjálsri í Reykjavík.
Móðirin fer daglega að leiði fjölskyldunnar
Ómar Örn Bjarnþórsson, verjandi Ming Mancel, segir að hún hafi verið í sérstakri stöðu á undanförnum mánuðum, algjörlega peningalaus og í farbanni frá Íslandi.
Hann segir að jafnvel þó að umbjóðanda hans, Ming Mancel, takist að sýna fram á að fjölskyldan hafi öll haft vilja til að deyja þá geti það varðað við lög að aðstoða fólk við að svipta sig lífi.
Það vakti athygli nokkurra gesta í Fossvogskirkjugarði þegar kona kom í fylgd lögreglumanna til að vera við jarðsetningu tveggja duftkerja.
Aðeins konan, lögreglumennirnir, prestur og útfararstjóri voru viðstödd athöfnina. Undanfarna sjö mánuði hefur hún svo vanið komur sínar daglega að leiði þeirra Emerics og Catherine í kirkjugarðinum.
