Velska söngkonan Duffy hefur sést á nýrri mynd í fyrsta sinn í meira en áratug eftir að hafa að mestu horfið úr sviðsljósinu í kjölfar áfalls sem hún varð fyrir árið 2010.
Myndin var tekin á kaffihúsinu Caffi Largo í bænum Pwllheli í Wales, þar sem starfsfólk staðarins fékk söngkonuna til að stilla sér upp fyrir mynd. Kaffihúsið birti myndina á samfélagsmiðlum í vikunni og hefur hún vakið talsverða athygli, enda Duffy í uppáhaldi hjá mörgum.
„Fræga söngkonan frá Nefyn, Amy Duffy, kíkti við á kaffihúsið í morgun. Það er alltaf yndislegt að sjá hæfileikaríkt heimafólk styðja við fyrirtæki í heimabyggð,“ skrifaði kaffihúsið með myndinni.
Á myndinni brosir Duffy og virðist vera í góðu skapi. Hún er með sitt einkennandi ljósa hár og er þetta í fyrsta sinn sem ný mynd af henni birtist opinberlega í mjög langan tíma.
Sjá einnig: Þetta er hræðileg ástæða þess að hin heimsfræga Duffy hvarf úr sviðsljósinu
Duffy sló í gegn á alþjóðavísu árið 2008 með laginu Mercy og plötunni Rockferry. Hún hlaut meðal annars Grammy-verðlaun og þrjú BRIT-verðlaun fyrir tónlist sína og var um tíma ein vinsælasta söngkona Bretlands.
Eftir að hafa gefið út aðra plötu hvarf hún hins vegar skyndilega úr sviðsljósinu. Árið 2020 greindi hún frá því að henni hefði verið byrlað ólyfjan, rænt og nauðgað árið 2010. Hún sagði reynsluna hafa haft djúpstæð áhrif á líf sitt og að hún hefði þurft mörg ár til að vinna úr áfallinu.
Söngkonan hefur lítið látið sjá sig opinberlega síðan þá, sem gerir nýju myndina sérstaklega athyglisverða fyrir aðdáendur hennar.
Undanfarna mánuði hafa þó komið fram vísbendingar um að Duffy sé að undirbúa endurkomu í tónlistinni. Hún hefur tilkynnt um litla tónleika í London í júlí næstkomandi þar sem hún hyggst flytja nýtt efni og jafnframt hefur verið greint frá því að heimildarmynd um líf hennar sé í vinnslu fyrir Disney+.
Nýja myndin gefur því enn frekari vísbendingar um að söngkonan sé smám saman að stíga aftur fram eftir erfiða tíma.
