„Þeir gera mig hálfblankan kynbótadómararnir, því nú þarf ég að splæsa í eitt ár í þjálfun í viðbót á Spörtu svo hún fái 9,5 fyrir skeið aftur,“ segir Ársæll Jónsson og glottir, en Sparta frá Eystra-Fróðholti er hæst dæmda hryssan í elsta flokki kynbótahryssna með 9,35 sem er önnur hæsta hæfileikaeinkunn sem kynbótahross hefur náð. Ársæll segir að þetta hafi náðst þrátt fyrir að hryssan hafi lækkað úr 9,5 í 9,0 fyrir skeið á mótinu.
Sparta er undan Spá frá Eystra-Fróðholti og Rauðskeggi frá Kjarnholtum. Spá er efst í kynbótamati afkvæma hryssna með 130 í einkunn og hafa fimm afkvæmi hennar hlotið fyrstu verðlaun í kynbótadómi. Spá er skyldleikaræktuð hryssa, undan Sæ frá Bakkakoti og Glettu frá Bakkakoti og eignaðist Ársæll sjö alsystkini undan þeim sem öll fóru í fyrstu verðlaun.
Ársæll segir að það sýni gæði Spörtu að hún sé ekki með nema 8,16 í byggingu en nái samt að standa efst á móti hryssum sem eru með 8,70-8,80 í byggingu.
Sjö hross frá þeim á mótinu
Bróðir Spár, Herskár frá Eystra-Fróðholti, kom inn á mót með 8,69 og segir Ársæll að forsýningin hafi mistekist eins og alltaf geti gerst með svona ung hross og bætir við að þetta sé frábær geðslagshestur í alla staði og eigi mikið inni. Hann hlaut engu að síður góðan dóm með 8,26 í aðaleinkunn.
Á landsmótinu eru sjö hross frá Eystra-Fróðholti og eru tvö þeirra enn þá í eigu Ársæls og Önnu Fíu Finnsdóttur, konu hans.
Sæla er stofnhryssan
Hrossarækt Ársæls og Önnu Fíu má rekja til hryssunnar Sælu frá Gerðum sem Ársæll keypti sem folald af Karli Benediktssyni. Hún var undan Ófeigi frá Flugumýri og Fífu frá Kópavogi sem var undan Herði frá Kolkuósi.
Ársæll hélt Sælu undir Orra frá Þúfu og sonur þeirra er heiðursverðlaunahesturinn Sær frá Bakkakoti.
„Sær fór strax í góð fyrstu verðlaun fjögurra vetra og var átta eða níu vetra þegar hann fékk fyrstu verðlaun fyrir afkvæmi og það er gaman að segja frá því að það var haldið undir hann fimmtán merum þegar hann var tveggja vetra og ellefu eða tólf af þeim fylgdu honum til fyrstu verðlauna.“
Sær hefur framræktast vel og eru margir afkomendur hans á landsmótinu á Hólum. Afkvæmi Kveiks frá Stangarlæk eru mörg hátt dæmd á mótinu, en Kveikur er undan Sæssyninum, Sjóð frá Kirkjubæ.
Ársæll nefnir líka Veigar frá Skipaskaga sem er sýndur til fyrstu verðlauna fyrir afkvæmi og hann er undan Sæssyninum, Arion frá Eystra-Fróðholti, albróður Spár, farsælum kynbótahesti sem féll fyrir aldur fram.
Allt byggist þetta á hryssunum
Spurður hverju hann þakki þennan góða árangur í hrossaræktinni gefur Ársæll sér góðan tíma til að svara en segir svo að hann hafi bara gert það sem honum datt í hug.
„Það hefur reynst mér best að láta hughrifin ráða. Þegar ég sé hest sem ég tel að passi á mínar merar þá tek ég ákvörðun strax. Það er ekki gott að bíða því þá getur maður farið að hugsa um eitthvað annað og það er ekki endilega betra.“
Spurður hvaða hesta hann hafi nýlega notað segir Ársæll að Spá hafi kastað folaldi undan Safír frá Laugardælum sem er nýr heimsmethafi.
„Ég á alsystur Spörtu og svo hef ég notað Dalvar frá Efsta-Seli sem stendur efstur í sex vetra flokknum. Ég notaði hann í tvö sumur og mamma hans er undan Arion þannig að það er orðið skyldleikaræktað þegar hann kemur í mínar merar. Allt byggist þetta á hryssunum og ég var heppinn að eignast Sælu, því það hefur spilast vel úr því.
Hlökk er efst í tölti T1
Ásmundur Ernir Snorrason og Hlökk frá Strandarhöfði áttu yfirburðasýningu í forkeppni í tölti og fengu 9,37 í einkunn. Frá einum dómara fengu þau 10 fyrir hægt og greitt tölt og 9,5 fyrir hraðabreytingar.
Á eftir þeim eru Jakob Svavar Sigurðsson og Skarpur frá Kýrholti með 8,77 í einkunn en þeir Jakob og Ásmundur háðu einvígi á Íslandsmótinu þar sem Jakob og Skarpur enduðu með meteinkunnina 9,61 í úrslitunum og titil í höfn. Það verður því hörkukeppni í A-úrslitunum á föstudagskvöldið. Þriðja er Brynja Kristinsdóttir á Sunnu frá Haukagili með 8,33 í einkunn.
Landsmótssetning
Formleg setning landsmótsins var í gærkvöldi og meðal gesta voru Logi Már Einarsson, menningar-, nýsköpunar- og háskólaráðherra, Gísli Gunnarsson vígslubiskup, Hólmfríður Sveinsdóttir, forseti Háskólans á Hólum, Elvar Einarsson, formaður hestamannafélagsins Skagfirðings, Magnús Barðdal sveitarstjóri, Sigrún Brynja Einarsdóttir ráðuneytisstjóri, Silja Bára Ómarsdóttir háskólarektor, Sylvía Sigurbjörnsdóttir, formaður Félags tamningamanna, og Willum Þór Þórsson forseti ÍSÍ.
