Byrjað verður að leggja vatnslögn frá Landeyjahöfn að Skansfjöru í Vestmannaeyjum í kvöld.
„Hún var sótt í síðustu viku til Danmerkur þar sem hún var framleidd. Nú eru þeir komnir með útlagningarskipið. Það kom hingað í morgun,“ segir Íris Róbertsdóttir, bæjarstjóri Vestmannaeyja, sem vonast til að lögnin verði tilbúin um helgina.
Lögnin er almannavarnalögn og verður því ekki nýtt til að dreifa vatni í Vestmannaeyjabæ. „En hún er sannarlega til staðar ef eitthvað kemur upp á eins og gerðist fyrir tæpum þremur árum,“ segir Íris.
Neysluvatnslögnin til Vestmannaeyja skemmdist eftir að akkeri togarans Hugins VE 55 hafnaði á henni í nóvember 2023. Bærinn höfðaði skaðabótamál gegn Hugin, Vinnslustöðinni og VÍS vegna skemmdanna og krafðist um tveggja milljarða króna. Ekki var fallist á kröfu bæjarins sem hefur áfrýjað málinu til Landsréttar.
Íris segir mikinn létti fyrir samfélagið að lögnin komist í gagnið. „Þetta verður mikill gleðidagur þegar það verður búið að tengja hana.“
