Lög um afnám jafnlaunavottunar voru samþykkt á Alþingi í vikunni. Með breytingunni fellur úr gildi kerfi sem lögfest var árið 2017 að frumkvæði Þorsteins Víglundssonar, þáverandi félags- og jafnréttismálaráðherra úr Viðreisn. Brynjar Níelsson, fyrrverandi þingmaður Sjálfstæðisflokksins og núverandi borgarfulltrúi, fagnar breytingunni og segir „dygðaskraut Viðreisnar“ loks vera tekið niður.
„Með æluna í hálsinum“
Jafnlaunavottunin fól í sér skyldu fyrirtækja og stofnana með 25 eða fleiri starfsmenn til að innleiða jafnlaunakerfi og afla staðfestingar á því að launagreiðslur færu fram án kynbundins mismunar. Markmiðið var að stuðla að launajafnrétti með aukinni skráningu, eftirliti og skýrslugjöf.
Frá upphafi sætti kerfið þó gagnrýni frá þeim sem töldu það fela í sér kostnaðarsama opinbera íhlutun með takmörkuðum ávinningi.
Brynjar rifjar upp að hann hafi sjálfur ekki verið sáttur við lögin þegar þau voru samþykkt.
„Ég þurfti að samþykkja hana á sínum tíma með æluna í hálsinum svo það yrðu ekki stjórnarslit á fyrstu mánuðum nýrrar ríkisstjórnar,“ skrifar hann á Facebook.
Hann bætir við að sú málamiðlun hafi reynst skammgóður vermir þar sem ríkisstjórnin hafi sprungið skömmu síðar „í geðrofi um miðja nótt út af engu“. Þar vísar hann til þess þegar Björt framtíð ákvað á næturfundi haustið 2017 að slíta stjórnarsamstarfi við Sjálfstæðisflokk og Viðreisn.
Sparnaður metinn á 1,5 milljarða
Með lögunum frá 2017 fékk Jafnréttisstofa það hlutverk að hafa eftirlit með framkvæmd jafnlaunakerfa, taka við gögnum frá fyrirtækjum og meta hvort þau uppfylltu kröfur jafnréttislaganna. Stofnunin hafði jafnframt heimild til að beita fyrirtæki dagsektum ef þau sinntu ekki skyldum sínum samkvæmt lögunum.
Í greinargerð með frumvarpinu sem nú hefur verið samþykkt er áætlað að afnám jafnlaunavottunar skili um 1,5 milljarða króna sparnaði á kjörtímabilinu. Stærstur hluti þess sparnaðar er talinn falla til hjá fyrirtækjum og stofnunum sem þurfa ekki lengur að standa undir kostnaði við vottunarferlið og tilheyrandi skýrslugjöf.
Dregur íslenska fánann að húni
Brynjar tengdi afnám jafnlaunavottunar einnig við nýlegar breytingar á fánareglum Reykjavíkurborgar, þar sem nýr meirihluti hefur ákveðið að draga úr notkun annarra fána en íslenska fánans við opinberar byggingar borgarinnar.
Af því tilefni sagðist hann hafa ákveðið að skipta út regnbogafánanum fyrir íslenska fánann.
„Ég ákvað að hvíla regnbogafánann í bili og dró að húni íslenska fánann í tilefni af því að leggja á jafnlaunavottunina niður,“ skrifaði borgarfulltrúinn.
