Bresk stjórnvöld hyggjast draga úr beinni þróunaraðstoð til sumra Afríkuríkja um allt að 90% á næstu þremur árum. Þetta kemur fram í nýrri ársskýrslu breska utanríkisráðuneytisins.
Samkvæmt upplýsingum frá bresku hjálparsamtökunum Bond verða framlög breskra stjórnvalda til Mósambík og Malaví skorin niður um 90% fram til ársins 2029. Framlög til Rúanda og Síerra Leóne minnka um 80% og til Sómalíu um 49%.
Á síðasta ári ákvað ríkisstjórn Verkamannaflokksins að draga umtalsvert úr þróunaraðstoð til að fjármagna aukin útgjöld til varnarmála. Þá vilja stjórnvöld beina auknu fjármagni til alþjóðlegra stofnana á borð við Alþjóðabankann, sem þau telja geta nýtt fjármunina með skilvirkari hætti.
Hjálparsamtök víða um heim hafa gagnrýnt niðurskurðinn harðlega. Þau segja hann stofna mikilvægum verkefnum í hættu. Skortur á beinum stuðningi geti aukið fátækt og óstöðugleika í ríkjum sem þegar glími við stórar áskoranir, meðal annars af völdum stöðugra átaka og loftslagsbreytinga.
Jenny Chapman, þróunarmálaráðherra Bretlands, segir stjórnvöld ekki snúa baki við alþjóðlegri þróunaraðstoð með niðurskurðinum. Þess í stað sé markmiðið að tryggja að hvert pund sem fari í þróunarmál nýtist sem best.
Umtalsverðar breytingar hafa orðið á stefnu breskra stjórnvalda í þróunaraðstoð á undanförnum árum.
Árið 2020 var Bretland eitt sjö ríkja heims sem náðu settu markmiði Sameinuðu þjóðanna um að verja 0,7% af vergum þjóðartekjum til þróunaraðstoðar. Eftir að hlutfallið var lækkað í 0,5% féll Bretland úr sjötta sæti á heimsvísu í það tíunda árið 2023. Nú stendur til að draga enn frekar úr fjárframlögum.
