Sjö prestsstörf hjá Þjóðkirkjunni hafa verið auglýst laus til umsóknar á vef kirkjunnar. Um er að ræða óvenju margar auglýsingar á sama tíma samkvæmt tilkynningu Þjóðkirkjunnar.

Störfin sem auglýst eru eru fjölbreytt og víða um land og meira að segja í útlöndum. Þar á meðal er staða sendiráðsprests í Danmörku með aðsetur í sendiráði Íslands í Kaupmannahöfn. Þá eru tvær prestsstöður lausar í Þingeyjarprestakalli, auk stöðu prests í Árborgarprestakalli.

Einnig er auglýst tímabundin afleysing í Þorlákshafnarprestakalli. Þá leitar Þjóðkirkjan að presti í Austfjarðaprestakalli með sérstakar skyldur gagnvart Norðfjarðar-, Eskifjarðar- og Reyðarfjarðarsóknum. Loks er auglýst eftir héraðspresti til starfa í Vestfjarðaprófastsdæmi með sérstaka þjónustu við Hólssókn í Bolungarvík.

Þjóðkirkja bendir einnig á að meðal síðustu verkefna Jónu Finnsdóttur á Biskupsstofu var að vinna að auglýsingu stöðu héraðsprests í Bolungarvík en hún er sjálf frá Bolungarvík. Hún lét af störfum sem mannauðsstjóri í vikunni.