Árásarmaður, sem hleypti af skotum á kvöldverði samtaka blaðamanna á Hilton-hótelinu í Washington, höfuðborg Bandaríkjanna í gær, segist hafa viljað skjóta embættismenn í Bandaríkjastjórn. Hann var yfirbugaður og Bandaríkjaforseti var fluttur burt í skyndi eftir að skothvellirnir heyrðust. Forsetinn og aðrir embættismenn eru óhultir.
Einkakennari og stundaði nám við virtan háskóla
Fjölmiðlar vestanhafs hafa birt nafn mannsins sem grunaður er um að hafa hleypt af skotum á viðburðinum. Hann heitir Cole Tomas Allen og er 31 árs, frá Torrance í Kaliforníu. Samkvæmt fjölmiðlinum CBS í Bandaríkjunum er hann kennari hjá einkakennaraþjónustu í Torrance. Óljóst er hvort hann sé enn að vinna þar.
CBS hefur þetta eftir tveimur lögreglumönnum. Allen stundaði einnig nám við virta háskólann California Institute of Technology, Caltech, en úskrifaðist þaðan 2017.
Allen var handtekinn af lífvarðasveit forsetans eftir atvikið og er í varðhaldi. Donald Trump Bandaríkjaforseti birti myndskeið úr öryggismyndavél á hótelinu þar sem Allen sést hlaupa, vopnaður, fram hjá öryggisvörðum í anddyri hótelsins. Trump birti einnig ljósmynd af Allen þar sem hann liggur á gólfinu á hótelinu handjárnaður og ber að ofan.
CBS hefur eftir tveimur heimildarmönnum innan lögreglunnar að Allen hafi sagt lögreglu að hann hafi ætlað að skjóta embættismenn í ríkisstjórn Trumps. Lögreglan segir hann hafa verið gest á Hilton-hótelinu í Washington D.C. þar sem kvöldverðurinn fór fram og að hann hafi verið þungvopnaður, með haglabyssu, handbyssu og fjölda hnífa á sér.
Todd Blanche, dómsmálaráðherra Bandaríkjanna, segir bráðabirgðaniðurstöður rannsóknar á atvikinu benda til þess að embættismenn í ríkisstjórn Bandaríkjanna hafi verið skotmark hans. Blanche var í viðtali í Meet the Press á NBC-sjónvarpsstöðinni og sagði rannsóknina eiga eftir að taka nokkra daga.
„Við teljum að hann hafi verið að beina sjónum sínum að embættismönnum með þessari árás, en eins og ég segi þá er þetta bráðabirgðaniðurstaða.“
Blanche segir Trump forseta líklega meðal þeirra embættismanna sem hann hafi viljað ráðast á en að hann vilji samt bíða og sjá hvað kemur út úr rannsókninni.
Allen verður færður fyrir dómara á morgun þar sem hann verður ákærður meðal annars fyrir að ráðast á alríkislögreglumann, að hafa hleypt af skotvopni og reynt að drepa alríkislögreglumann.
Mikil ringulreið
Kvöldverður Samtaka blaðamanna í Hvíta húsinu var nýbyrjaður þegar skothvellir heyrðust og mikil ringulreið braust út. Lífverðir forsetans fluttu hann með hraði í öruggt skjól en mikil ringulreið braust út.
Trump og aðrir gestir á kvöldverðinum sluppu óhultir en Allen skaut einn úr lífvarðasveit forsetans. Sá var í öryggisvesti, var fluttur til aðhlynningar á sjúkrahús og er við góða heilsu.
Fréttamenn sem voru viðstaddir segja að erfitt hafi verið að átta sig á því hvað var að gerast fyrst um sinn. Gary O'Donoghue, aðalfréttaritari BBC í Norður-Ameríku, segist ekki fyrst hafa áttað sig á hvaða hljóð hafi heyrst.
„Ég var nýbúinn að leggja niður hnífapörin og tók varla eftir skothvellunum sem heyrðust einhvers staðar fyrir framan mig í áttina að innganginum að salnum á hótelinu. Á örskotsstundu hugsaði ég: Þetta eru lágu hvellirnir sem hálfsjálfvirk vopn gefa frá sér.“
O'Donoghue er blindur og sagðist hafa einbeitt sér að hljóðunum, hann hafi síðan heyrt gler brotna. „Síðan fann ég höfuðið á Daniel, samstarfsmanni mínum sem ég hafði verið að tala við, strjúkast fram hjá mér og áttaði mig á því að hann var að stökkva á gólfið. Ég fylgdi á eftir honum.“
Wolf Blitzer, fréttamaður hjá CNN, var rétt hjá árásarmanninum þegar hann hóf skothríð fyrir utan veislusalinn þar sem kvöldverðurinn fór fram. Hann var nýkominn af klósettinu þegar hann sá mann með stórt vopn.
„Allt í einu heyrði ég hávær, mjög háhvær, mjög ógnvekjandi byssuskot nærri mér. Næsta sem gerðist var að lögreglumaður henti mér í jörðina og henti sér ofan á mig.“
Honum var síðan fylgt af lögreglu aftur inn á karlaklósettið þar sem á annan tug fólks leitaði skjóls.
„Ég hafði enga hugmynd um að ég væri að heyra byssuskot, hvert árásarmaðurinn væri að miða eða ef hann væri að reyna að hræða alla. Fyrsta sem ég hugsaði var hvort hann ætlaði að skjóta mig. Þetta var hræðilegt, mjög skelfilegt augnablik fyrir mig.“
Líklega hættulegasta starf í heimi
Trump hélt blaðamannafund eftir atvikið þar sem hann sagði lögregluna og leyniþjónustuna hafa brugðist hratt og hárrétt við. Hann sagði grunaðan árásarmann mjög veika manneskju. „Við viljum ekki að svona hlutir gerist. Ég tel að það sé mjög mikilvægt að segja það.“
Hann sagði Melaniu, eiginkonu sína, vera í áfalli eftir atvikið en sagðist staðráðinn í að halda kvöldverðinn aftur innan 30 daga. „Það verður stærri, betri og flottari viðburður. Ég vil bara þakka öllum þeim sem komu að atvikinu. Ég vil þakka fjölmiðlum. Þið hafið verið mjög ábyrg í ykkar umfjöllun, ég verð að segja það.“
Hann sagði starf forsetans líklega það hættulegasta í heimi. „Ég get ekki ímyndað mér að það sé til hættulegra starf. En ég elska þetta land og er mjög stoltur. Ég er stoltur af því sem við höfum gert. Við eigum frábært land. Við eigum að mínu mati heitasta og farsælasta land í heiminum. Við ætlum að gera frábæra hluti en því fylgir áhætta, það er engin spurning um það.“
Hefð er fyrir því að sitjandi Bandaríkjaforseti sé heiðursgestur kvöldverðarins. Þetta er þó í fyrsta sinn sem Trump þiggur boð á kvöldverðinn.
Þetta er ekki fyrsta atvikið þar sem árásarmaður reynir að komast í návígi við forsetann. Í júlí 2024 var Trump skotinn í eyrað á kosningafundi í Pennsylvaníu. Í september sama ár var Trump fluttur burt í flýti af golfvellinum sínum í West Palm Beach í Flórída, eftir að lífvarðasveit hans fann mann með byssu fela sig í runnum vallarins. Í febrúar á þessu ári var vopnaður maður skotinn til bana eftir að hafa komist inn á Mar-a-Lago, setur forsetans í Flórída. Trump var í Washington þegar atvikið átti sér stað.
