„Ríkisstjórnin afgreiddi á fundi sínum í morgun frumvarp um frestun verkfallsins. Ég mun leggja fram frumvarp seinna í dag,“ segir Eyjólfur Ármannsson innviðaráðherra.
Hann segir að rætt hafi verið við formenn Sjálfstæðisflokksins og Framsóknarflokksins, og þingflokksformann Miðflokksins, um frumvarpið.
Hann segist ekki hafa rætt sjálfur við þau heldur hafi forsætisráðherra gert það. Og að þau yrðu að tala fyrir sjálf sig um þetta mál.
Hann segir samstöðu í ríkisstjórn um málið.
Elise og Angelie segjast vilja komast aftur heim til Frakklands. Þær eru á leiðinni til Parísar þaðan sem þær taka lest heim til sín. Þær segjast hafa fengið eina tilkynningu um verkfallið um að hugsanlega þyrftu þær að breyta flugi sínu sjálfar. Þær hafi ekki gert það vegna þess að þær bjuggust við því að það yrði flogið. Þær bíði nú fregna um annað flug og upplýsinga.
Ríkisstjórnin samþykkti einróma á fundi sínum í morgun að setja lög á verkfall flugvirkja. Alþingi verður kallað saman síðar í dag til að samþykkja lögin. Rætt hefur verið við formenn stjórnarandstöðuflokkanna og þeir styðja lagasetninguna.
Guðjón Helgason, upplýsingafulltrúi Isavia, segir ekki fleira fólk á flugvellinum en á venjulegum miðvikudagsmorgni. Þangað sé mætt fólk sem ætti flug með Icelandair, sem sé þar að leita upplýsinga og starfsfólk Isavia aðstoði með það eftir bestu getu. Isavia hafi kallað út aukamannskap í morgun.
„Mér skilst reyndar að upplýsingagjöfin hjá Icelandair í aðdraganda verkfallsins hafi verið mjög öflug þannig að farþegar hafa vitað hvað stefndi
30 flugferðir með öðrum flugfélögum en Icelandair eru á áætlun frá Keflavíkurflugvelli í dag.
„Sá hópur er akkúrat núna að koma í hinn svokallaða mið-morgunbanka á leið í flug.“
Guðjón hvetur farþega til að fylgjast vel með upplýsingum á vef Isavia.
„Og við hvetjum fólk í raun til að koma ekki upp á völl nema það liggi fyrir að flugið sé að fara.“
Það er talsverð örtröð á Keflavíkurflugvelli. Starfsfólk Icelandair dreifði snakki og vatni til farþega sem biðu í löngum röðum á flugvellinum í morgun.
Alþingi verður kallað saman síðdegis til að ræða og setja lög á verkfall flugvirkja hjá Icelandair. Þetta herma heimildir fréttastofu.
Verkfallið hófst á miðnætti og felldi Icelandair niður allt morgunflug. Ríkisstjórnin kom saman til stutts fundar í morgun. Það er óvenjulegur fundartími þar sem stjórnin hittist alla jafna þriðjudaga og föstudaga.
Ríkisstjórnin hélt afar stuttan fund í morgun.
Fréttastofa hefur ekki fengið upplýsingar um hvert fundarefnið var. Þar sem það er mjög óvenjulegt að ríkisstjórnarfundir séu haldnir á miðvikudegi má þó velta því upp að flugvirkjaverkfall sem hófst í morgun kunni að hafa verið til umræðu.
Vangaveltur hafa verið uppi um hvort stjórnvöld myndu grípa inn í kjaradeiluna. Það er hægt að gera með lagasetningu.
Alla jafna eru ríkisstjórnarfundir haldnir á þriðjudögum og föstudögum.
Hólmfríður Dagný Friðjónsdóttir fréttamaður ræddi við Stacy Miller frá Wisconsin í Bandaríkjunum. Hún er á Keflavíkurflugvelli ásamt fjölskyldu sinni. Þau voru á leið til Skotlands eftir dvöl á Íslandi.
Hún var í röð við innritunarborð Icelandair að bíða eftir inneignarmiða fyrir hóteli. Hún kvaðst einnig ætla að hringja á hótelið sem þau voru á til að athuga hvort þau gætu haldið herberginu sínu, því þau ættu ekkert flug út.
Hér er lausleg þýðing á viðtalinu, sem er á ensku í spilaranum.
„Við vildum virkilega koma til Íslands og höfum átt frábæran tíma hér, en þetta er bara einn viðkomustaður í fjölskyldufríinu okkar. Nú sitjum við föst hér,“ segir Stacy.
„Og því miður, þó ég skilji það vel þar sem ég vinn sjálf í ferðaþjónustu, þá getur enginn raunverulega hjálpað okkur. Við erum því komin í mikið klúður vegna þess að það eru svo fá flugfélög sem fljúga til Íslands. Það er svolítið óhugnanlegt þegar maður hugsar um hversu mikið Ísland reiðir sig á ferðaþjónustu að ekki hafi verið gert meira til að leysa þetta verkfall. Það virðist sem þetta hefði verið svo auðvelt að leysa þegar litið er til þess trausts sem tapast, kostnaðarins sem fellur til og þess hversu mikla peninga var í raun verið að fara fram á.“
Stacy segir að það hafi verið tilkynning við bókunina um að verkfall gæti hugsanlega haft áhrif á ferðalagið.
„En hvað á maður að gera? Maður er búinn að bóka allar íbúðirnar sínar í tveimur löndum. Maður er kominn með bílaleigubíl. Maður er búinn að bóka ferðir. Þannig að maður verður bara að halda áfram og vona að það takist að leysa málið.“
Spurð hvernig upplýsingagjöf frá Icelandair hafi verið segir Stacy að hún vildi að hún væri meiri.
„En ég skil það að einhverju leyti, miðað við allt fólkið sem reynir að fá flug bókað. En þau hafa vitað lengi að þetta gæti gerst. Þau hefðu átt að vera að taka frá sæti allan tímann. Enginn veit hvenær við komumst héðan og þá vaknar líka spurningin hvað verður um íbúðirnar sem ég er með bókaðar við Loch Ness eða á Skye-eyju. Þetta eru því mikil vonbrigði.“
Ari Fossdal, stöðvarstjóri á Akureyrarflugvelli, og samstarfsfólk hans mætti til starfa í morgun eins og venjulega. Farþegarnir létu þó ekki sjá sig vegna verkfalls flugvirkja.
„Við erum náttúrulega með flug eftir hádegi á áætlun en dagurinn okkar fer í að svara símanum og aðstoða fólk eins og hægt er.“
Andrea Banki ætlaði að fljúga til Þýskalands í morgun en þegar fréttastofa rakst á hana sat Banki á gólfinu í flugstöðinni og beið upplýsinga.
„Ég bíð eftir að fljúga heim. Ég bíð eftir fluginu til Frankfurt.“
Banki vissi af verkfallinu en hafði ekki upplýst hana um að flugferðin hennar yrði felld niður.
„Enginn hefur sagt til um hvort ég komist heim eða ekki. Ég bíð svara frá Þyskalandi um hvort ég geti flogið heim í dag.“
Allt flug Icelandair í morgun var fellt niður vegna verkfallsins.
Til stóð að fljúga tvisvar milli Akureyrar og Reykjavíkur. Ekkert varð af þeim flugferðum frekar en öðrum.
Tómlegt var um að litast á Akureyrarflugvelli þegar Siguróli Magni Sigurðsson fréttamaður var þar á áttunda tímanum í morgun.
Icelandair hefur boðið flugfarþegum sem komu á Keflavíkurflugvöll rútuferðir til Reykjavíkur. Fólk er beðið um að halda fyrir í röðum meðan verið er að skipuleggja ferðirnar.
Nokkur fjöldi farþega kom á flugvöllinn og var ekki viss um hvaða áhrif verkfallið hefði.
„Við höfum ekkert verið boðaðir til viðræðna síðan um miðjan dag í gær,“ segir Óskar Einarsson, formaður Flugvirkjafélags Íslands, sem er jafnframt formaður samninganefndar félagsins.
Óskar segir að menn hafi kastað hlutum sín á milli í gær til að leita leiða til að liðka fyrir lausn kjaradeilunnar. Hann segist hafa rætt við Boga Nils Bogason, forstjóra Icelandair, í síma í gærkvöldi.
„Það stendur ekki á okkur,“ segir Óskar um lausn kjaradeilunnar.
Fjöldi fólks er á Keflavíkurflugvelli, þar á meðal farþegar sem ætluðu að fljúga af landi brott með Icelandair í morgun. Þar er líka Ragnar Visage ljósmyndari sem tók þessar myndir í morgun
Hólmfríður Dagný Friðjónsdóttir fréttamaður og Víðir Hólm Ólafsson tökumaður mættu í Leifstöð klukkan sex. Hún segir að flugfarþegum hafi fjölgað mikið síðan þá en fólk sé samt rólegt að bíða eftir upplýsingum.
Enginn starfsmaður er við innritunarborðin á vegum Icelandair, og þar hefur mjög löng biðröð myndast af Icelandair flugfarþegum. Hólmfríður segir að viðmælendur hennar sýni þessu skilning, og vissu klárlega hvað var í vændum. Flugfarþegar bíði frekari upplýsinga.
Í kallkerfinu er verið að bjóða rútuferðir ókeypis í bæinn.
Góðan dag og velkomin í fréttavakt um verkfall flugvirkja hjá Icelandair og þau áhrif sem það hefur á millilandaflug og innanlandsflug Icelandair.
Flugfélagið felldi í gærkvöld niður allar flugferðir sem áttu að hefjast að morgni. Reynt verður að koma fólki á áfangastað með öðrum flugfélögum.
Hér flytjum við fréttir af því sem er að gerast á flugvöllum landsins og því hvort gangur komist á viðræður Flugvirkjafélags Íslands og Icelandair um samning.
