Á síðustu tveimur árum hefur aðsókn í Þjóðleikhúsið farið vaxandi og í kjölfarið hefur það hlutfall tekna leikhússins sem hefur komið af miðasölu aukist. Þessar fregnir berast um það leyti sem að sýningar leikhúsins fengu flest verðlaun á Grímunni, íslensku leiklistarverðlaununum.
Grímuverðlaunin voru afhent í gærkvöldi og fengu sýningar Þjóðleikhússins á því leikári sem senn lýkur flest verðlaun eða níu. Sú sýning leikhússins sem fékk flestar tilnefningar, Ormstunga, fékk þó engin verðlaun en Óresteia fékk verðlaunin fyrir bæði leikrit og sýningu ársins.
Í svari Loga Más Einarssonar, menningar-, nýsköpunar- og háskólaráðherra við fyrirspurn frá Þorsteini B. Sæmundssyni, varaþingmanni Miðflokksins, kemur fram að sjálfsaflafé leikhússins hafi verið óvenjumikið síðustu tvö ár vegna góðs gengis.
Segir í svarinu að opinber stuðningur til rekstrar Þjóðleikhússins hafi verið á bilinu 68–79 prósent af heildartekjum, fyrir utan árið 2020 þegar lokað var fyrir tekjustrauma vegna samkomubanns vegna heimsfaraldurs Covid-19. Hlutfall miðasölutekna hafi verið á bilinu 18–27 prósent, að undanskildu árinu 2020. Á síðustu tveimur árum hafi hlutfall miðasölu aukist í 27 prósent vegna mikillar aðsóknar og góðs gengis. Þetta hlutfall milli opinbers stuðnings og sjálfsaflafjár sé í takt við það sem gerist í flestum sambærilegum leikhúsum í Vestur-Evrópu en þó sé algengara að hlutfall sjálfsaflafjár sé ögn lægra en í tilfelli Þjóðleikhússins.
Fjórðungur
Árið 2024 hækkaði hlutfall miðasölutekna af heildartekjum leikhússins úr 18 í 27 prósent og hlutfallið hélst óbreytt á síðasta ári. Hlutfall framlags ríkisins af heildartekjunum fór þá úr 78 niður í 68 prósent.
Í svarinu eru þó gefin upp hlutföll tekna leikhússins af miðasölu og af framlagi ríkisins en þessi hlutföll eru samanlagt á síðustu 10 árum á bilinu 94-98 prósent og því kemur væntanlega lítið hlutfall tekna leikhússins annars staðar frá en þess er ekki getið í svari Loga hvaðan þessar tekjur koma.
Upphæð tekna af miðasölu koma ekki fram í svarinu en heildartekjur leikhússins voru 1,9 milljarður króna árið 2023, 2,2 milljarðar 2024 og 2,3 milljarðar árið 2025.
Miðað við uppgefin hlutföll hafa miðasölutekjurnar þá verið 343,2 milljónir króna árið 2023 en síðan hækkað árið 2024 upp í 590 milljónir. Á síðasta ári voru tekjur af miðasölu 612,2 milljónir.
Framlag ríkisins til Þjóðleikhússins á þessum þremur árum var, miðað við uppgefin hlutföll, 1,48 milljarðar bæði árin 2023 og 2024 en hækkaði í 1,54 milljarða á síðasta ári.
Hækkun miðasölutekna hefur því verið nokkuð meiri á síðustu tveimur árum, frá því sem var 2023, en hækkun á framlagi ríkisins. Hækkunin helst í hendur við fjölgun á seldum miðum. Árið 2023 voru seldir miðar 78.970 en fjölgaði í 103.285 árið 2024 og á síðasta ári voru seldir miðar 104.902. Fjöldi boðsmiða var um 9.500-9.700 á þessum sama tíma.
Segir í svari Loga að heildaraðsókn í húsið á árinu 2025 hafi verið, þegar með séu taldar skólasýningar á Orra óstöðvandi, skoðunarferðir, námskeið og aðrir viðburðir á vegum leikhússins, rúmlega 121.000 heimsóknir. Það er ígildi þess að um það bil einn af hverjum fjórum landsmönnum hafi komið í Þjóðleikhúsið á síðasta ári.
Verð
Almennt miðaverð á síðasta ári var 7.950 krónur og hafði hækkað frá 2024 um 400 krónur. Árið 2015 var miðaverðið 4.950 krónur en þessi hækkun er í nokkru samræmi við almenna hækkun verðlags á sama tíu ára tímabili, miðað við verðlagsreiknivél Hagstofunnar.
Um miðaverðið segir í svari Loga að hækkanir á miðaverði hafi verið til að mæta hærra verðlagi. Þjóðleikhúsið kappkosti sem fyrr að halda miðaverði sem lægstu og gera sem flestum kleift að sækja leikhús. Í þeim tilgangi séu boðnar leiðir til að fá miða með lækkuðu miðaverði í gegnum kort af ýmsu tagi, auk þess sem sérstökum hópum og skólahópum séu boðnir miðar með umtalsverðum afslætti.
