Þúsundir hafa sýnt Haraldi heitnum Noregskonungi virðingu sína síðustu daga með því að koma að kistu hans í konungskapellunni í höllinni.
Nú um hádegisbil sagði norska hirðin að fólk geti vænst þess að þurfa að bíða allt að sjö klukkustundir í röð eftir að fá að hneigja sig fyrir konungi. Röðin nær um kílómetra frá höllinni.
Til að minnka biðina hefur hirðin ákveðið að hafa kapelluna opna til klukkan ellefu að kvöldi fram á þriðjudag. Daginn eftir verður Haraldur jarðsunginn og búist er við fjölda tiginna gesta hvaðanæva úr heiminum.
Því er óhætt að segja að allt sé á öðrum endanum í Osló við skipulagningu og undirbúning athafnarinnar. Hluta miðborgarinnar verður lokað fyrir almennri umferð og hert öryggisgæsla verður í borginni og við landamærin.
Yfirmenn lögreglu segjast enga áhættu ætla að taka. Norska ríkisútvarpið greindi frá því í dag að Donald Trump Bandaríkjaforseti verði á tveggja daga ráðstefnu Repúblikanaflokksins í Texas þegar útför Haraldar verður gerð.
Þúsundir lögreglu- og hermanna, norskra, danskra og sænskra, verða til að gæta öryggis á götum Oslóar enda búist við að tugþúsundir safnist saman í miðborginni. Tæplega 2.000 hermenn standa heiðursvörð meðfram leiðinni frá konungshöllinni að Oslóardómkirkju og til Akerhus-virkis þar sem Haraldur verður lagður til hinstu hvílu.
Fréttin var uppfærð í hádeginu með nýjustu upplýsingum um lengd raðarinnar.
