Fimm Evrópuríki hyggjast reisa brottvísunarstöð í Rúanda fyrir hælisleitendur sem neitað hefur verið um alþjóðlega vernd. Búist er við því að fyrirætlanirnar verði kynntar á fundi í Vín í Austurríki síðdegis í dag.
Í júní samþykkti Evrópuþingið ný lög sem heimila aðildarríkjum að reisa brottvísunarstöðvar utan ESB. Síðan þá hafa Danmörk, Þýskaland, Holland, Austurríki og Grikkland unnið að því að koma slíku úrræði á koppinn og sammæltust um það í september. Þarlend stjórnvöld hafa áður sagst vona að hægt verði að opna brottvísunarstöð á næsta ári.
Í viðtali við danska ríkisútvarpið, DR, segir Morten Bødskov ráðherra útlendingamála að ekki verði hægt að senda erlenda brotamenn sem vísa eigi úr landi til Rúanda. „En við ætlum að byrja á þeim sem við getum sent nú þegar, hælisleitendur sem hafa fengið synjun. Það er nokkur fjöldi í kerfinu okkar,“ segir Bødskov. Til að byrja með verði um 100 manns sendir til Rúanda.
Andstaða meðal stuðningsflokka ríkisstjórnarinnar
Stjórnmálaskýrendur DR segja samninginn nokkurn sigur fyrir Mette Frederiksen forsætisráðherra. Í það minnsta tveir flokkar sem styðja ríkisstjórnina hafa þó lýst sínum efasemdum.
„Ég er mjög ósátt með þetta. Við höfum alltaf verið rækilega mótfallin þessum ráðagerðum og erum það enn,“ segir Anna Bjerre sem er talskona Valkostsins, e. Alternativet, flokks sem styður ríkisstjórnina.
Hún telur ómögulegt að tryggja að mannréttindi fólks verði tryggð í brottvísunarstöð í Rúanda.
Peder Hvelplund, talsmaður útlendingamála hjá Einingu, e. Enhedslisten, hafði einnig sínar efasemdir í september og taldi varhugavert að senda fólk í brottvísunarbúðir í þriðja ríki. Hætta væri á að hælisleitendur enduðu í einræðisríkjum þar sem erfitt yrði að tryggja að mannréttindi fólksins verði ekki brotin.