Í dag eru fjörutíu ár frá Chernobyl-slysinu þegar einn ofnanna í Chernobyl-kjarnorkuverkinu í Úkraínu sprakk. Kjarnorkuslysið er eitt versta slys sinnar tegundar í heiminum. Mannleg mistök við öryggisprófun urðu til þess að kjarnaofn fjögur sprakk og gífurlegt magn geislavirkra efna barst út í andrúmsloftið. Eldur logaði í kjarnorkuofninum í 10 daga.
Úkraína tilheyrði Sovétríkjunum þegar slysið átti sér stað. Fyrst um sinn neituðu sovéskir embættismenn að slys hefði orðið í kjarnorkuverinu. Þegar geislun fór að mælast í nágrannalöndum var ljóst að slysið væri mun alvarlegra en stjórnvöld höfðu greint frá.
Talið er að kjarnorkuslysið hafi valdið dauða allt að 4.000-100.000 manns beint eða óbeint. Að minnsta kosti 600.000 manns komu að hreinsunarstarfi og urðu fyrir mikilli geislun.
Alls voru um 2.200 ferkílómetrar landsvæðis í Úkraínu og um 2600 í Suður-Belarús úrskurðuð óbyggileg vegna geislavirkni eftir slysið. Ekki er talið óhætt fyrir nokkra manneskju að búa þar næstu 24.000 árin.
Íbúum í borginni Pripyat var gert að yfirgefa borgina í skyndi þegar kjarnorkuslysið átti sér stað og enginn fékk að snúa aftur heim á leið. Um 48 þúsund íbúar bjuggu í borginni sem er aðeins þrjá kílómetra frá Chernobyl-kjarnorkuverinu. Borgin er fátt annað en draugaborg og minnisvarði um stærsta kjarnorkuslys sögunnar.
Ítarlega var fjallað um Chernobyl-slysið í Heimskviðum nýverið.
