Ráðningarsamningur bæjarstjórnar Kópavogs, fyrir hönd bæjarins, við Ásdísi Kristjánsdóttur, vegna ráðningar hennar sem bæjarstjóri til næstu fjögurra ára, hefur verið gerður opinber. Bæjarfulltrúar úr minnihluta bæjarstjórnar gagnrýna samninginn fyrir ógagnsæi og segja ekki koma skýrt fram í honum hver heildarlaun Ásdísar verði. Meirihlutinn vill hins vegar meina að fullt gagnsæi ríki um kjör bæjarstjórans.
Grunnlaun Ásdísar verða 2.428.287 krónur á mánuði, miðað við 1. apríl 2025. Hún fær ekki greitt aukalega fyrir yfirvinnu.
Launin skulu taka breytingum samkvæmt þróun þingfararkaups í fyrsta skipti þann 1. júlí næstkomandi.
Ásdís er einnig oddviti Sjálfstæðisflokksins í bæjarstjórn og samkvæmt samningnum fær hún greitt aukalega þóknun fyrir setu í bæjarstjórn, ráðum og nefndum og mun sú þóknun taka mið af launakjörum bæjarfulltrúa eins og þau eru á hverjum tíma. Engar tölur í því samhengi eru nefndar.
Auk launa fær Ásdís greiddan kostnað vegna aksturs á eigin bifreið í þágu starfs síns sem nemur, 1.250 kílómetra en nú fást greiddar 187.500 krónur fyrir það. Akstursgreiðslurnar miðaðst við taxta ríkisins vegna greiðslna fyrir akstur eins og hann er á hverjum tíma. Til samanburðar má nefna að bæjarstjórinn á Akureyri fær greitt fyrir akstur samkvæmt akstursdagbók en bæjarstjóri Vestmannaeyja fær greitt fyrir ákveðinn kílómetrafjölda á mánuði.
Bæjarsjóður greiðir iðgjöld af slysa- og líftryggingu Ásdísar en það er einnig gert á Akureyri í tilfelli bæjarstjórans þar, Berglindar Óskar Guðmyndsdóttur.
Þetta er nýr bæjarstjóri á Akureyri með í laun – Bærinn greiðir fyrir líftryggingu
Ekkert er hins vegar minnst á í ráðningarsamningnum að Kópavogsbær greiði fyrir síma og tölvu sem Ásdís notar vegna starfs síns eins og raunin er með bæjarstjóra Akureyrar og Vestmannaeyja. Ekkert uppsagnarákvæði er heldur í ráðningarsamningi Ásdísar eins og í tilfelli Berglindar Óskar á Akureyri og Írisar Róbertsdóttur bæjarstjóra Vestmannaeyja. Þó var breytingartillaga þess efnis samþykkt á fundi bæjarstjórnar Kópavogs en þar er minnst á 6. grein samningsins sem er þó hvergi sjáanleg í þeirri útgáfu samningsins sem birtur er með fundargerð bæjarstjórnar og því virðist sem það hafi gleymst að birta allar síður samningsins. Samkvæmt breytingartillögunni, sem var samþykkt samhljóða, fær Ásdís greidd laun í 6 mánuði eftir að ráðningartíma (kjörtímabilinu 2026-2030) lýkur en þó aðeins verði hún ekki endurráðin. Láti Ásdís af störfum fyrir lok kjörtímabilsins og hefur störf fyrir annan aðila, skulu launagreiðslur frá Kópavogsbæ falla niður ef laun er nýja starfinu fylgja eru jöfn eða hærri. Ef launin í nýja starfinu eru lægri skal greiða Ásdísi launamismuninn í 6 mánuði.
Gagnrýni
Ráðningarsamningur Ásdísar var samþykktur á fyrsta fundi nýkjörinnar bæjarstjórnar Kópavogs sem fram fór í gær en Ásdís hefur verið bæjarstjóri síðan 2022.
Jónas Már Torfason og Eydís Inga Valsdóttir bæjarfulltrúar Samfylkingarinnar lögðu fram tillögu um að samþykkt samningsins yrði frestað og formanni bæjarráðs falið að uppfæra drögin með þannig hætti að heildarlaun bæjarstjórans væru tilgreind:
„Í stað þess að almenn laun bæjarstjóra séu tilgreind en við þau bætast hinnar ýmsu viðbótargreiðslur og uppfærslur á launum. Í ljósi hækkunar þingfarakaups 1. júlí nk., sem laun bæjarstjóra fylgir, er lagt til að samningsdrögin tilgreini sérstaklega áætluð laun samkvæmt þeirri uppfærslu.“
Meirihluti Sjálfstæðisflokks og Framsóknarflokks felldi tillöguna.
Í kjölfarið lögðu Jónas Már og Eydís Inga fram bókun þar sem þau sögðu mikilvægt að kjör pólitískra fulltrúa og æðstu ráðamanna bæjarins væru gagnsæ, en ráðningarsamningur bæjarstjórans væri það ekki:
„Laun hækka umtalsvert 1. júlí nk., eftir tæpan mánuð, en ekki hefur verið gerð grein fyrir endanlegri fjárhæð. Þá vekur athygli að bæjarstjóri, sem er í fullu starfi sem pólitískur fulltrúi en ekki einungis embættismaður, fær jafnframt greitt sem bæjarfulltrúi en strípað starf bæjarfulltrúa er skilgreint sem um 25% starfshlutfall, án tillits til nefndarsetu. Auk þess fær hann greitt fyrir setu í stjórn Slökkviliðs höfuðborgarsvæðisins, sem telja verður eðlilegan hluta af störfum hans, og akstursstyrk sem nemur tæplega 200 þúsund krónum á mánuði, án þess að gerð sé krafa um akstursdagbók í samræmi við leiðbeiningar Skattsins.“
Sögðu Jónas Már og Eydís Inga að það ætti ekki að vera flókið reikningsdæmi að finna heildarlaun kjörinna fulltrúa, sér í lagi þegar forsendurnar væru óljósar eða óaðgengilegar. Lögðu þau til að heildarlaun bæjarstjóra verði ákveðin sem ein heildargreiðsla fyrir störf í þágu bæjarins, en ekki bútasaumur ólíkra greiðslna. Sagði að lokum í bókuninni að þótt sambærilegt fyrirkomulag kynni að tíðkast í nágrannasveitarfélögum ætti Kópavogur að vera í fremstu röð hvað varði gagnsæi, sér í lagi þegar pólitískir fulltrúar ákveði eigin laun.
Samþykkt
Bæjarfulltrúar meirihlutans andmæltu því að ráðningarsamningur Ásdísar einkenndist af ógagnsæi með bókun:
„Með samþykkt bæjarstjórnar Kópavogs þann 29. apríl 2025 voru gerðar breytingar á ráðningarkjörum bæjarstjóra, m.a. í þágu gagnsæis. Í breytingunum var skýrt aðgreint á milli launa fyrir starf bæjarstjóra annars vegar og þóknana fyrir setu í bæjarstjórn, ráðum og nefndum hins vegar. Með breytingunum var í senn farið að lögum og gagnsæi aukið í launasetningu fyrir starf bæjarstjóra hjá Kópavogsbæ. Þar að auki var horfið frá fyrra fyrirkomulagi þar sem launin hækkuðu tvisvar á ári m.v. launavísitölu, og þess í stað taki launin breytingum í samræmi við þróun þingfararkaups einu sinni á ári, þann 1. júlí ár hvert, en þau munu samkvæmt upplýsingum frá forsætisráðherra þá taka hækkun um 3,5%.“
Ráðningarsamningurinn var loks samþykktur með atkvæðum meirihlutans og Einars Jóhannesar Guðnasonar bæjarfulltrúa Miðflokksins. Bæjarfulltrúar Samfylkingarinnar og María Ellen Steingrímsdóttir bæjarfulltrúi Viðreisnar sátu hjá. Þess er ekki getið sérstaklega í fundargerð að Ásdís hafi vikið af fundinum og kallað inn varamann þegar atkvæði voru um ráðningarsamning hennar.
