Fjölmörg rútustopp eru í Reykjavík og flest þeirra í miðborginn, alls tíu. Eitt þeirra, númer 8, er á Skólavörðuholti við Hallgrímskirkju og hefur það stopp lengi verið þyrnir í augum íbúa, Íbúasamtaka miðborgarinnar og starfsmanna og foreldra á leikskólanum Grænuborg sem er hinu megin Eiríksgötu.
Aksturstakmarkanir hópbifreiða eru í stórum hluta miðbæjarins og liggur línan meðal annars frá Barónstíg meðfram kirkjunni og síðan niður Njarðargötu. Má því segja að umferð hópbifreiða á þessum stað keyri akkúrat á línunni.
Íbúi vakti athygli á því í hópnum Íbúar í miðborg á Facebook að bílstjóri hópbifreiðar hefði keyrt niður götuljós á þessum stað.
„Ein af þessum ferðamanna rútum sem leggja við Hallgrímskirkju tókst að keyra niður götuljósin á horni Eiríksgötu og Barónsstíg um 16:30 í dag. Þetta er á sama tíma og fólk sækir börnin sín á leikskólan Grænuborg. Er ekki komið nóg af þessum rútu akstri á þessi svæði ? Förum ekki út í hvað ökumenn eiga til að bruna þarna upp götuna á öllum tímum þrátt fyrir 30 km hámarks hraða.“
Kona segir rúturuglið í miðbænum yfirgengilegt og hafa verið lengi, einkennilegt sé einnig að íbúar eigi að ganga meðan ferðamenn eru keyrðir heim að dyrum.
„Annars vegar reyna borgaryfirvöld að fullyrða að við íbúar eigum að ganga að heiman og nota almenningssamgöngur. Þau setja allstaðar á bílastæðagjöld, loka götum, búa til göngugötur o.s.frv. En hins vegar þarf að keyra túrista í rútum af stærstu gerð alveg upp að dyrum í þröngum götum með mikilli bílaumferð og mikilli umferð gangandi og hjólandi. Svona fyrir utan að þær stoppa hvar sem er.“
Margrét Erla Maack blaðamaður og fjöllistakona segir leikskólastjórann á Grænuborg hafa ítrekað sent erindi til borgarinnar vegna rútanna, án árangurs.
Kona sem býr á Njarðargötu tekur undir að komið sé nóg af rútuferðum á Skólavörðuholtinu.
„Niður Njarðargötuna ganga óteljandi rútuferðir allan daginn, sérstaklega á sumrin, m.a. tveggja hæða rauði strætóinn sem kemur stundum hver á eftir öðrum þó mér hafi verið sagt hjá borginni að þeir hafi leyfi fyrir ferðum á x mínútna fresti. Það stemmir ekki því ég hef skoðað það sérstaklega (tekið myndir og skráð tímann), ferðirnar eru tíðari. Stundum þegar strætóinn fer framhjá húsinu er annar sjáanlegur ofar í götunni þannig að það eru stundum frekar sekúndur sem líða á milli ferða en mínútur. Hann og aðrar rútur eru stundum stopp hérna beint fyrir utan stofugluggana hjá mér, oft vegna umferðar úr gagnstæðri átt, og þá er ég með fólk í ca 2 metra fjarlægð sem horfir beint inn í alla íbúðina, liggur við að ég geti rétt þeim kaffibolla út um gluggann. Rútan á myndinni frá Reykjavík Excursions (úps, komið að því að þrífa glugga að utan!) var stopp hér fyrir utan um daginn í dágóðan tíma á meðan var verið að annað hvort taka á móti farþegum eða hleypa út og það var verulega óþægileg tilfinning því það var eins og ég væri með fólkið bara inn í stofu. Eins og mér líður vel hérna og vil hvergi annars staðar vera þá er þessi staða orðin algjörlega ólíðandi. Njarðargatan er alltof þröng gata fyrir alla þessa rútuumferð og ég vildi óska að íbúar hér tækju höndum saman og sendu inn mótmæli til borgarinnar.“
Með orðum sínum birtir konan mynd þar sem sjá má að rútan er við gluggann að íbúð hennar.
Segir stoppin ekki skipulögð af þeim sem keyra rúturnar
Unnur María Máney leiðsögumaður segir: „Við sem vinnum við þetta HÖTUM tour bus stop #8/Hallgrímskirkju. Af hverju Reykjavíkurborg datt í hug þetta væri sniðugt vitum við ekki. Þessi tour bus stopp voru amk ekki skipulögð af neinum sem hefur keyrt rútu um Reykjavik.“
Jóhanna Svala grafískur hönnuður þakkar Unni fyrir að segja þetta upphátt og spyr hvort að BSÍ sé ekki rétt hjá: „Ferðamenn eru alveg vanir því að þurfa að labba nokkur skref þó svo við Íslendingar erum það ekki. Ég þarf að keyra þarna framhjá til að komast heim til mín, þá sjaldan að ég er á bíl og þetta er gjörsamlega óþolandi þetta rútufargan þarna við Hallgrímskirkju. Það ætti ekki að hleypa rútum frekar en strætó inn fyrir ákveðið svæði í miðborginni.“
Segir strætó einnig keyra hratt
Kona nokkur segir að strætó sé einnig á fleygiferð í hverfinu og „það er bara tímaspursmál hvenær slys verður, mætti alveg fylgjast betur með hraðakstri hjá þeim.“
Karlmaður rifjar upp að hafa verið ítrekað stopp á Skólavörðustíg meðan rútur hleyptu farþegum og farangri út:
„Það voru rútur af minni gerðinni sem voru vanar að stoppa fyrir utan Hótel Adam á Skólavörðustíg á miðri götu og stoppuðu umferð í báðar áttir til að hleypa út öllum farþegum og farangri þeirra, oftar en einu sinni stoppaði ég fyrir aftan þessar rútur og lagðist á flautuna stanslaust í 5-10min meðan túristar stoppuðu alla umferð til að afferma heila rútu á miðri götunni, túristarnir horfðu á mig einsog ég væri einhver dóni. Hvenær kusum við íbúar Reykjavíkur að þetta ætti að vera borg sem forgangsraðar túristum? Annað hvert hús í minni götu eru hótel íbúðir fyrir túrista. Restin af íbúðunum hýsa erlent starfsfólk sem þarf að flytja inn til þess að þjóna þessum túristum. Við erum einsog geirfuglinn, þau sem eru uppalin í miðbænum og búum þar enn.“
Rúturnar eiga að fara að BSÍ
Fyrir tæpu ári samþykkti meirihluti umhverfis- og skipulagsráðs Reykjavíkur að rútustæði við Hallgrímskirkju yrði flutt niður að BSÍ, var bókað um að næst færi í hönd verkhönnun og gerð útboðsgagna. Íbúasamtök miðborgarinnar hafa fengið þau svör frá borginni að rútustæðið muni ekki verða flutt fyrr en framkvæmdum við nýjan Landspítala og bílastæði við hann og BSÍ verði lokið.
