Vörur frá Blue Lagoon Skin Science eru nú í fyrsta skipti til sölu í brottfararverslun Ísland Duty Free og þar er þeim gert sérstaklega hátt undir höfði.
Ísland Duty Free hefur að undanförnu staðið í breytingum á verslunum sínum á Keflavíkurflugvelli. Sérstakt íslenskt svæði er í búðunum sem er unnið í samvinnu við arkitektastofuna Basalt og er íslensk náttúra höfð að leiðarljósi við hönnunina. Meðal annars standa nú þriggja metra háir ísjakar í versluninni sem eru unnir úr 3D-prentuðu endurunnu plasti. Þar eru vörur frá Blue Lagoon Skin Science til sölu. Kemur þetta fram í tilkynningu.
„Við lögðum mikla áherslu á að skapa einstaka upplifun fyrir viðskiptavini á okkar svæði og hönnuðum meðal annars sérstakt hraunborð með stafrænum skjá þar sem einkaleyfisvörðum innihaldsefnum húðvara Blue Lagoon Skin Science eru gerð góð skil. Í hillum rýmisins má sjá hvítan bakgrunn með kísiláferð sem vísar í eitt af lykilinnihaldsefnum húðvaranna. Þá er skemmtilegt að gólfefnið endurspeglar jafnframt vatn Bláa lónsins og skapar þannig sterka tengingu við upprunann,“ segir Hólmfríður Einarsdóttir, framkvæmdastjóri Blue Lagoon Skin Science.
Vörurnar frá Blue Lagoon Skin Science eru þekktar á heimsvísu og hafa unnið til margra verðlauna. „Það er því mikill fengur fyrir okkur að fá Blue Lagoon Skin Science inn í brottfararverslunina, bæði eru þar þekktar vörur en hönnunin á svæðinu þeirra er líka alveg einstök og í takt við þá íslensku upplifun sem við viljum leggja áherslu á,“ segir Liam Grundy framkvæmdastjóri Ísland Duty Free.
„Það er okkur mjög mikilvægt að hafa íslenskar vörur í öndvegi í verslunum okkar, sérstaklega brottfararversluninni. Við lítum á verslanirnar okkar sem tækifæri til að tengja íslenska framleiðslu við heiminn og höfum tekið besta svæðið undir einungis íslenskar vörur,“ segir Liam Grundy, framkvæmdastjóri Ísland Duty Free, í tilkynningunni.
Breytingum á verslunum Ísland Duty Free í flugstöðinni verður lokið í ágúst og stendur til að þær verði formlega opnaðar með pompi og prakt í september.
„Við erum afar ánægð með samstarfið við Ísland Duty Free og stolt af því að vera svona stór hluti af þessari glæsilegu nýju verslun, segir Hólmfríður og bætir við: „Við erum þakklát fyrir þann metnað sem Heinemann og Ísland Duty Free sýna íslenskum vörumerkjum og þá áherslu sem lögð er á að skapa ferðamönnum ekta íslenska upplifun. Þetta er einstakt tækifæri til að kynna íslenska húðvöru fyrir gestum alls staðar að úr heiminum. Við hlökkum mikið til formlegrar opnunar í september og til áframhaldandi samstarfs við Ísland Duty Free.“
